Ang grabeng katambok

Sa Amerika, mga 30%  sa ilang populasyon ang grabe na sa katambok ang mga tawo didto. Bisan dinhi sa atoa, daghan na sad tang makita nga mga tambok ilabi na diha sa mga fastfood o mga kan-anan o bisan diing dapita. Tingali nasayod na kita kun unsay epekto sa lawas kun ingon kita niini. Dali ra kita mataptan sa mga sakit sama sa dayabetes, hayblad, kanser, atake sa kasingkasing ug uban pang komplikadong balatian gumikan sa pagkatambok.

Busa angayan natong sagupon ang hustong istilo sa pagkaon, aron nga mamintinar ang normal nga timbang sa lawas. Sulaye kuno ning pipila ka paagi:   

(1) Unaha ang pag-inom sa tubig o sabaw sa dili pa mokaon, aron dali ka mabusog bisa’g gamay ray gikaon, basta masustansiya lang ang pagkaon.

 (2) Ayaw pagkaon atubangan sa lamesa nga may daghang nakadispli nga pagkaon, aron di matental sa pagdungag sa gikaon.

(3) Dili magkinamot, gamita ang kutsarita o chopstick, aron matak-an ka sa paghungit ug bation ka na’g busog bisa’g gamay pay nakaon.

(4) Gamay lang nga plato o platito, aron di daghan ang makaon. Pag-anad nga kausa ra maghukad. Kaon sa mga prutas o utanon, ug dili ka nang mantikaon.

(5) Inom kanunay sa bisan unsang herbal tea o cinnamon powder nga isagol sa mga pagkaon aron dili dali gutomon.

(6) Kun magsnaks, mahimo na ang mansanas, o kaha kamote, patatas, saging, balanghoy ug ubang bungahoy o lagutmon nga makabusog.

(7) Mamahaw nga may 2 kabuok linung-ag o lutong itlog, aron moubos ang timbang. Kini segun sa pagtuon sa 2008 International Journal of Obesity.

(8) Moinom permi og daghang tubig apan kanang dili bugnaw. Pero likayan na ang pag-inom sa tubig o ilimnong sama sa beer panahon sa gabii o inig ka tug.

(9) Di magsige og pamuwaw, aron di gutomon magsige’g hunahuna’g kaunon.

(10) Pagseguro nga kompleto ka sa nutrisyon pinaagi sa pagtomar og natural food supplement nga may kompletong mga bitamina, minerals ug anti-oxidants, sama sa dekalidad nga spirulina Filipina ug uban pa.

Hinuon  di lalim bag-ohon nato ang kinaiya sa kinan-an nato, apan kun gusto kita nga dili magkaproblema sa atong panglawas, gikinahanglan buhaton dayon.