Rain or shine ang pagtuo

Mao kini ang atong nasaksihan sa atong pagsaulog sa miaging fiesta sa Santo Niño de Cebu.  Gani tapus sa makalilisang nga nagsunodsunod nga katalagman, wala katibhangi ang kainit sa atong pagtoo, hinuon, nakapalig-on kini.

Maoy hinungdan nga taliwa sa hulga sa dautang panahon, gani, bisan pa sa mga pag-uwan,  nagdasok gihapon ang mga nanambong sa mga novena-masses, ug ubang kalihokan sa simbahan. Alang sa mga deboto sa Balaang Bata, rain or shine ang ilang Pagtoo.

Ug katingalahan sa tanang katingalahan, nga sa pag-procession ug sa pagsaulog sa Santos nga Misa  sa kahulogan, wala gayud mag-uwan, igo lang naghabuhabo, uban sa makusog nga hangin. Niining mga panahona, ang bagyong Agaton wala pa mogawas sa atong nasud.

Ang tiunay ug hugot nga Pagtoo, dili conditional, dili agad sa panahon, dili agad sa kahimtang sa tawo, dili agad sa panglawas. Maoy hinungdan nga tungod kay dili conditional ang debosyon sa Santo Niño, nagpabiling gihugopan ang Basilica, hangtud ang kadalanan nga naglibot niini, puno sa katawhan, nga bisan kun matutaligsik, di gyud matarog.

Hulagway kini sa dili mabuntog nga Pagtoo. Magpabilin kini hangtud sa hangtod. Pakapin na lang ang Sinulog Grand Parade.

Of course, nakadugang kini sa kasibot ug ka-saya sa kasaulogan. Apan, angay hinumdoman nga ang Sinulog Grand Parade, pahinungod ug halad gihapon sa kabalaan sa Milagrusong Bata…. Ug dili kiat-kiat, dili karnabal, dili mardi gras.

* **

Ang labing adunahang nasud sa tibuok kalibutan. Nangukay ko sa karaan  nakong file sa mga clippings, ug usa sa akong naukayan mao ang mahitungod sa labing dato nga nasud sa tibuok kalibutan … ang gamay’ng isla sa Nauru sa South Pacific.

Ang tibuok isla, 8.2 square miles ra ang gidak-on, malibot sulod lamang sa 20 minutos. Ang molupyo 7,500 ra ka tawo, mas daghan pa ang population sa atong mga barangay dinhi. Ang tibuok isla, makita gikan sa gamay’ng bintana sa eroplano.

Ang isla walay industriya, walay mga mall sama sa SM ug Ayala, walay sapa, usa ra ang sementadong dalan (main road), ug tungod kay irregular ang ulan, lisud ang pagpang-uma. Apan, gumikan sa ilang kaadunahan, moderno ang kabalayan, ug hayahay kaayo ang ilang pagpuyo, hapit tanang tawo adunay mahalon nga mga awto (wala sila makaila unsa ning multicab, pedicab, ug habalhabal).

No unemployment, no taxes, ang gobyerno maoy mobayad sa medical care. Porbidang hayahaya sa kinabuhi. Ang tanan nilang panginahanglan pulos imported, kay lagi, wala man sila’y industriya, wala’y mga planta.

Dili pareho dinhi sa ato nga kun dunay mga foreign aid nga pagkaon, atong ilisdan sa local nga mga produkto aron makatilaw intawon ta’g imported nga linata.

Unsay nakapaadunahan sa Nauru? Ang abundang phosphate. Giingon dinhi: “Nauru is virtually a solid mound of phosphate, a residue of generations of bird droppings that is made into fertilizer.”

Ang article gisuwat sa mga 1970s. Ambut waa pa ba mahurot ang phosphate. Apan, isip pangandam, 60% sa ilang revenue gi-trust fund, gi-invest sa stocks ug properties abroad.