Ang nagkalapad nga Sinulog Festival sa Sugbo

Ang Sinulog Festival sa Sugbo nga gidala sa pari nga Agustino nga gihimo sa  wala pa ang World War II sanglit sumala sa nahipos nga kasayuran nga kaniadto sa matag tinuig nga pangilin ni Senyor Santo Niño gipasiugdahan na kini kaniadto sa sulod lang sa simbahan ug gisagop usab sa mga manindahay og kandila.

Ang mopalit og kandila nga mga relihiyosong katoliko sa dili pa kini nila dad-on sa dagkotanan maoy ilang hangyoon ang manindahay og kandila nga ilang gipalitan sa pagsinulog ug pagsampit sa ngalan sa tawo nga nagpasinulog nga nagkanayon…”Sinulog kang Tatay kini! Sinulog kang Nanay kini! Sinulog kang Lola kini!”

Sumala pa sa mga relihiysong Katoliko nga ang Sinulog  maoy sayaw nga festival nga gihimo isip sa pagpasidungog sa Senyor Santo Niño nga maoy  patron kaniadto sa siyudad sa Sugbo sa  wala pa  ikadeklarar nga patron ang Birhen sa Guadalupe.

Ang Sinulog Festival pagalangkoban sa grupo sa mga tawo nga babaye ug lalaki, bata ug hingkod na ang panuigon nga mosayaw sa kadalanan pinaagi sa pag-ikid ug kaduha paingon sa unahan ug pag-ikid makausa sa pag-tras og balik sa agi.

Gihimo kini sa dakbayan sa Sugbo sa matag ikatulong Domingo nga mao usab ang pagsaulog sa Piyesta sa Senyor sa matag tuig nga matag moapil magsul-ob og colorful costume nga mosayaw sa pagdayeg ug pagpasalamat kang Senyor Santo Niño sa mga grasya ug panalangin nga ilang nadawat.

Himoon ang Sinulog Festival sa dakbayan sa Sugbo sa matag ikatulo nga Domingo sa bulan sa Enero sa matag tuig nga sumala pa ang pulong nga Sinulog  gikan sa pulong nga “Sulog” nga nagpasabot sa pagdagayday sa tubig o sulog sa tubig.

Ang mga paglakang o pag-ikid sa pagsayaw sa sinulog nga maoy gisunod ang karaang estilo nga mao usab ang matang sa estilo nga pag-ikid o pagsayaw nga mao usab ang estelo sa pagsayaw nga gigamit sa panahon pa ni Hara Humamay nga ginganlan ni  Magellan og Rayna Juana human sa gihimo usab nga pagbunyag. Sumala pa sa mga nagdumala sa festival sa Sugbo nga samtang nagkadugay ang Sinulog sa  wala lamang kini makadasig sa mga Sugboanon kon dili lakip na usab sa mga relihiyosong katilingban sa nagkalainlaing lalawigan kay nagkalapad pa man ang maong matang sa festival dili lang dinhi sa lalawigan sa Sugbo kun dili lakip na usab sa nagkalainlaing lalawigan sa nasud.