AIDS: Lisod kapugngan

Bisan pa sa mga pahimangno sa Departamento sa Panglawas, aduna gihapoy nabiktima sa malaglagon nga sakit. Ug kini mao ang Acquired Immuno Deficiency Syndrome (AIDS). Gani duha man ang namatay niining maong sakit sa miaging tuig.

Mananakod kining maong balatian o sakit. Dinhi sa Sugbo, usa ka 34 anyos nga call center agent ug usa ka 46 anyos nga beautician ang namatay sa miaging tuig. Kining maong sakit makuha sa pakighilawas sa binuhat nga adunay sakit niini.

Lisod kapugngan ug masanta kining sakita kun ang usa ka binuhat magpaturagas la’g gamit sa babaye ilabi na sa gitawag nga commercial sex worker. Daghan na ang mga pahimangno nga gihimo sa DOH kabahin niining sakita apan nagpadayon gihapon sa pagkatap ang maong mananakod nga sakit tungod ra usab sa wala’y pag-amping nga pakighilawas.

Gani, si National Director sa AIDS Free Philippines Dr. Rene Josef Bullecer mibutyag nga gikan sa Enero ngadto sa Nobiyembre sa miaging tuig, 98 ang bag-ong kaso sa HIV, mas daghan sa 86 nga kaso sa maong sakit sa tuig 2012. Kining HIV maoy sintomas sa sakit nga AIDS.

Dugay na kining sakita. Ug ang gobiyerno kanunay nagpakatap og impormasyon bahin niini. Apan nagpadayon gihapon sa pagsaka ang gidaghanon sa nataptan sa maong sakit. Wala’y kapuslanan ang paghatag og dugang pang mga impormasyon sa paglikay sa maong sakit kun kita dili magpatalinghog sa pag-amping aron kapugngan ug kalikayan ang maong mananakod nga sakit.

Daghan gihapon ang nadisgrasya

Ang kagahi sa ulo maoy rason kun  nganong daghan lang gihapon ang nangasamad sa pabuto sa miaging Pasko ug ilabi na gayod niadtong Bag-ong Tuig. Pastilan, ang mga tawo sab nga adunay armas, nagpasagad lang sa pagpabuto sa ilang armas. Adunay mga inosenteng bata nga naigo sa saag nga bala. Alaot intawon tong namatay gayod.

Bisa’g unsaon sa pagpahimangno sa gobiyerno nga maglikay niining maong buhat aron mapugngan ang moabot nga disgrasya, dili gayod maminaw. Ang solusyon niini mao ang tinud-anay nga pagpanakop sa salaod panahon sa Pasko ug Bag-ong Tuig, tinud-on gayod sa pagdakop ug paggukod sa gobiyerno.