Nganong mas pinangga ang apo kay sa anak?

Ingon akong kauban sa trabaho nga lami kuno kaayo ang bation sa usa ka amahan kun aduna na kini apo. Ug iyang gipamatud-an ang maong matang sa kalipay nga iyang gibati. Gisapnay, giduyan ug gihagkan niya iyang apo sa tanang oras nga gihatagan siya’g kahigayonan. Gikan sa lampin hangtod ngadto sa mga playing toys, gihatag niya. Samot na, mata’g tuig nga mag-birthday iyang apo, bongga gyud ang giandam niyang hikay.

Gipangutana ko siya, nganong mas pinangga man alang nimo ang apo kay sa anak? Mitubag ang enhinyero kong higala: “Lahi man gud ang apo ikomparar sa anak. Ang apo kun imong hagkan, humot kaayo samtang ang anak, nanimaho nang bino ug upos sa sigarilyo. Ang smile sa baby makawagtang sa kalaay ug makapalupad nimo’g balik ngadto sa panahon nga ikaw sama niya, inosente pang bata nga nagkinahanglan sa hustong pag-agak sa mga ginikanan. Samtang ang anak, labi nag adik o palahubog dili na mahagkan. Kay sama sa dako nang kahoy, dili na mahapyod ang bawog nilang sanga aron matul-id.”

Nasawod ko ang gusto niyang ipasabot. Klaro kaayo nga niadtong gagmay pa ang iyang mga anak, nagtubo kini nga wala makatagamtam sa hustong pag-amuma sa ilang amahan. Klaro kaayo nga may dakong kakulangan ang iyang pagpadako kanila. Tingali, gisalig lang niya ang tanang kaakohan ngadto sa iyang misis samtang siya nagsige la’g bubarkada o lingawlingaw sa mga balay-kahilayan. Busa, namunga’g salawayong resulta. Gusto niya nga korehian kadtong dakong sayop nga iyang nahimo sa nangaging katuigan. Apan dili na niya mabalik ang kagahapon. Dili na niya mahikap kadtong iyang mga sipyat kanhi aron iyang mapapas ug matul-id. Hinuon, mahimong makorehian ang maong sayop sa umaabot nga mga adlaw— sa mga adlaw nga aduna na siya’y apo, diin kun unsa man ang mga pagkakulang nga wa niya mahatag ngadto sa iyang mga anak, niining higayona mabuhos ug mapahimuslan na kini tanan sa iyang apo.

Kun half-cooked or overcooked man ang pagka-baked sa cake nga iyang giluto kanhi, karon seguroon niya nga perfectly baked na kini. Ug mao kini rason nganong mas pinangga ang apo kay sa mga anak.