Angay usbon

Giangkon ni Mayor Michael Rama nga husto ang akong pagpakabana kabahin sa pagbutang og mga bleachers, kana bitaw’ng mga lingkoranan nga ipahimutang daplin sa karsada nga agian sa Sinulog Grand Parade.

Gihisgutan man gud nako sa miagi nga lindog nga adunay mga kontraktor nga magbutang og bleachers daplin sa karsada, sama nianang sagad magtukod og bleachers atubangan sa Mango Square, ang Rustans kaniadto, nga ipagamit lang sa iyang mga amigo.

Law-ay kaayo kana nga paagi uy. Atul sa press conference sa City Hall, ipahibalo sa mayor nga libre ang paggamit sa mao nga mga bleachers nga gitukod sa mga contractors kay agi og pagtabang sa dakbayan.

Apan lahi diay ang tinuoray nga tumong sa pipila niining mao nga mga kontraktors. Ang tumong diay nila mao nga makabutang sila og bleachers aron nga ang ilang mga kawani ug mga higala anha makapahimutang ug dili ang “general public.”

Maayo unta kun usbon na sa tagdumala sa PLD Construction ang gihimo nila sa miaging tuig. Gibutangan g’yud nila og tawo nga mobantay sa bleachers aron walay lain nga makasaka.

Dili kadto angay nga himoon sa mao nga kontraktor kay ang dapit nga gitukoran sa bleachers aseras. Kun gusto kamo nga magbutang og bleachers nga para sa inyong mga kawani, anha kini tukora sa pribado nga lugar nga dili maglakip sa aseras.

Hagiton gayud nako niini si Mayor Michael Rama ug ang kadagkoan sa Sinulog Foundation Incorporated nga mentras may higayon pa, ila kini nga tan-awon ang mao nga isyu.

Gawas sa PLD Construction, daghan pa nga naghimo niini nga ang gitukod nila nga bleachers para lang sa ilang kawani. Ang gidayeg nako mao kanang maghimo og bleachers sa Imus Road kay pasak-an man bisan kinsa ang mosaka.

Usbon nako pagpasabot nga kun ang inyong tumong mao nga kontrolahon ninyo ang mga tawo nga mosaka mao nga magbutang kamo’g mobantay, ayaw pugngi ang mga tawo nga mosaka kun duna pa’y lugar.

Si Mayor Rama kanunay nga maglibut-libot sa rota nga agian sa Sinulog Grand Parade, bisan gani og nagsugod na ang parada, apan wala makabantay niining mao nga sitwasyon.

Utro pa kining mga tawo nga gitudlo sa mayor nga kunohay sakop sa Sinulog Task Force, dagku ra ba kaayo’g ID nga “Office of the Mayor” kaniadto apan walay gihimo.

* * *

Wala g’yuy lami tan-awon ang Sinulog Street Dancing, ilabi na diha sa General Maxilum Avenue kay wala man kuhaa nila ang sementado nga “road separators” kanang mga semento nga gibutang taliwala sa karsada.

Abi ninyo’g ngano? Mapugngan ang mga dancers sa ilang pagsayaw kay hagip-ot kaayo ang lugar. Pwede man unta kana kuhaon ang uban apan wala g’yud kahuna-huna.