Uban kanato

Kun maghisgot kita og Bunyag, gikan kini sa pulong Baptisma sa Griyego nga nagkahulogan og pagtunlob kon immersion. Ang kinaiya sa bunyag ni Juan ang nakasentro sa kausabang moral sa tawo. Apan bisan pa man kun wala’y sala ang atong Ginoo ang nitahan sa iyang kaugalingon alang sa maong proseso agi’g sinugdanan sa iyang buhat diha sa pagsangyaw. Ang maong buhat ni Jesus timailhan lamang sa tinud-anay nga kahulogan sa iyang Pagka-Dios nga siya Dios uban kanato nga nagpuyo gyud in solidarity kanatong mga tawo. Ang matag binunyagan nahimong kabahin sa Lawas Mistiko ni Kristo. Nahimo kang kabahin niya nga tungod niini imong katungod ug katungdanan ang pagpanginlabot sa mga buluhaton sa imong pangulo diin ikaw nahimong kabahin. Busa matag binunyagan gidapit aron mamahimong Pari diha sa kinabuhi sa Pag-Ampo. Propeta diha sa pagsangyaw sa Maayong Balita pinaagi sa pulong ug sa buhat. Hari diha sa kinabuhing maalagaron. Dugang pa niini, ang matag binunyagan ang maghimo sa iyang kinabuhi ingon nga buhing kamatuoran sa ngalan nga iyang gidala.