Labing mubo nga pagsaulog sa Pasko ang tuig 2013

Daghan ang nag-ingon nga panahon sa karaang panahon maoy gihimo sa atong katigulangan ang hilabihan gayod kataas sa tuig nga pagsaulog sa Pasko kay sa pagsulod sa bulan sa Septiyembre masinati na man nila ang pagtagamtam sa  kasaulogan sa kasumaran sa pagkatawo ni Ginoong Hesukristo.

Matud pa sa mga katigulangan nga kaniadto sa ilang panahon sa bulan sa Septiyembre daw masinati na ang umaabot nga pagsaulog sa Pasko kay mao na man usab nianang maong bulan sa ilang pagsugod sa pagpahimo og kalendaryo kadtong mga tagdumala og patigayon o sa mga tawo nga adunay ikasarang sa pagpangahatag og kalendaryo.

Dugang pa nila nga ang mosunod nga mga bulan sa Oktubre, Agosto ang pipila  ka mga balay maoy mamatikdan kaniadto nga magsugod na sa pagpahimutang sa mga dayan-dayan sa Pasko nga naglakip sa pagbitay og mga parol. Pagpabarog na og Christmas tree ug uban pa.

Sa pagliwas gayod sa pagsaulog sa adlaw sa mga kalag ug  adlaw sa mga santos sa Nobyimbre 1 ug 2  labi  pa gayod nga mokisaw ang kasaulogan sa pasko kay mamatikdan na man ang labi pa gayod nga pagdagsang sa mga mananaygon ug magkadaghan na ang mopatugtog sa mga Paskohanong awit nga makahatag og kamabulokon sa gipaabot nga pagsaulog sa  pasko sa Disyembre 25 sa matag tuig.

Ang kamainiton sa mga tawo sa pagsaulog sa pasko bisan kun mulabay na ang  Disyembre 25 sa gihapon magpadayon ang katawhan sa paghimo og mga kalihokan nga naglambigit sa  pasko bisan sa pagsugat sa bag-ong tuig dako gihapon og kalambigitan sa maong kasaulogan kay magpadayon man ang pagpanghatag o ang pagdawat sa ihatag nga pinaskohan. Dugang pa nila nga bisan sa Enero ug Pebrero naglambigit gihapon  ang pagsaulog sa  pasko kay sa Enero 3 sa matag tuig magsaulog man usab sa  Three Kings o Tulo ka Hari nga mibisita kang Ginoong Hesukristo dihang gihimugso sa iyang inahan nga si Birhen Maria didto sa pasongan sa mga baka ug molungtad pa kini sa Pebrero 6 nga  mao usab  ang adlaw sa katapusan sa kasaulogan sa pasko nga mao ang  kandelarya.

Karong panahon daw namatikdan nga nagkamubo na gayod ang pagpahigayon sa mga kalihokan sa maong kasaulogan kay human sa pagsugat sa tungang gabii sa pasko sa pakasunod adlaw dili na man Paskohanong awit ang atong mabati kon dili ang kanta na sa Sinulog ang ipatugtog sa mga sibyaanan sa radyo,  mga  mall ug mga dagkong tindahan.