Duha ka-tuig na!

Pipila ka adlaw na lang tangkod nang duha ka tuig sukad nahitabo ang pangpangawat sulod sa buhatan sa Sinulog Foundation, Incorporated.

Sa dili madugay saulogon na pud sa dakbayan sa Sugbo ang tinuig nga Sinulog Festival apan hangtud ron wa gyu’ y bisan dyutay nga timailhan nga duol na ang kasulbaran sa kaso.

Busy na pud ang kadagkuan sa SFI sa preparasyon sa Sinulog, pagpangayo og sponsorships apan daw sa ilang nakalimtan ang pagpursigi sa imbistigasyon sa kaso.

Duna kahay mga opisyal sa SFI nga buot hikalimtan na lang sa hingpit ang pagkahanaw sa P1.6 milyones diha sa ilang buhatan maong wala na magpursigi nga hingusgan sa kapolisan ang imbistigasyon?

Duna pa bay naglihok sa atong kapolisan aron ipadayon ang imbistigasyon sa kaso o gipasagdan na lang nga agop-opon ang case folder niini?

Sa akong tan-aw kuwang og interest ang kadagkuan sa SFI nga apurahon ang kapolisan sa ilang imbistigasyon.

Dili man unta lisud nga mahatagan og prioridad ang maong kaso tungod kay ang pangulo sa SFI mao man mismo ang mayor sa dakbayan.

Kun ipursigir ni Mayor Mike Rama ang kapolisan dinhi sa dakbayan pagsulbad sa kaso siguradong mahatagan ni og prioridad.

Apan daw sa gilubong na lang pud sa mayor sa kalimot ang nahitabo. Mao nga akong pahinumduman si Mayor Rama nga padayonon ang imbistigasyon.

Dako ning insulto niya isip mayor nga dili masulbad ang kaso sa pagpangawat diha mismo sa usa ka foundation nga iyang gipangulohan.

Panahon na nga sukdon sa mayor ang abilidad sa hepe sa kapolisan dinhi sa dakbayan pagsulbad sa maong kaso.

Personal nga gipili ni Rama si Col. Noli Romana nga maoy iyang himuong hepe sa kapolisan dinhi sa dakbayan kay dako ang iyang pagsalig sa abilidad niini.

Busa maayong ipakita ni Romana ngadto sa mayor ang maong abilidad pagsulbad sa maong kaso.

Daghan og maayong laki'ng imbistigador ang kapolisan sa dakbayan nga mamahimong magamit, kana kun disidido gyud silang masulbad ang maong kaso.

Usa sa mga opisyal sa kapolisan dinhi sa dakbayan nga akong gisaludohan ug sa akong tan-aw makasulbad sa kaso mao si Chief Insp. Romeo Santander.

Tingali dyutay'ng pressure lang gikan sa mga opisyal sa SFI ug sa mayor mismo ang kuwang aron masulbad na ang maong kaso.

Nagtuo ko nga way krimin nga di masulbad kun ipadayon lang ang interest sa mga hingtungdan pagsulbad niini.

* * *

[email protected].