Unsay buhaton aron makurihian ang sayop nga spelling sa pangan?

Happy New Year kanatong tanan. Hinaut nga magmabungahon ang tuig 2014 alang kanato. Sa unang  adlaw sa tuig 2014, atong tubagon kining pangutana labot sa problema sa iyang birth certificate. Unsay buhaton kun imong pakurihian ang sayop nga spelling sa imong pangan? Kana nga pangutana ang atong tubagon karon sa atong column.

Dear Atty. Divine,

Aduna lang unta ko’y  ipangutana labot sa akong problema sa akong birth certificate. Ang akong gigamit nga pangan Ma. Theresa, pero sa akong NSO ang akong first name Maria Teresa gusto unta nako nga usbon ang akong Birth Certificate aron di ko maproblema sa akong SSS ug Pagibig. Unsa may angayan nako nga buhaton? Mamahimo ba nako nga usbon ang entry sa akong Birth Certificate nga di na moagi sa korte? Asa man ko moduol aron pag-usab sa akong pangan?  Salamat sa imong pagtubag sa akong pangutana. —Terry

Dear Terry,

Kaniadto ang bisan unsang kausaban  nga himoon sa Birth Certificate moagi gyud sa Korte basi sa Rule 108 sa Revised Rules of Court. Kini gumikan usab sa Article 412 sa atong Civil Code nga nagkanayon: “No entry in a civil register shall be changed or corrected, without a judicial order.”  Apan human napasar ang Republic Act No. 9048, nga giaprobahan niadtong March 22, 2001, aduna nay mga entry sa Birth Certificate nga di na moagi sa Korte sama sa  clerical or typographical  errors ug ang change of first name or nickname. Sa imo nga kaso, di ka na  kinahanglang moagi pa sa Korte kun imong ipausab ang spelling sa imong pangan kay mamahimo ra kini nimong i-file ngadto sa Local Civil Registrar diin ka marehistro. Sa imong Petition nga ipasaka sa Local Civil Registrar imo kining lakipan  og  1) certified true machine copy sa imong birth certificate, 2) at least two public or private documents showing the correct entry nga mao unyay basihan sa pag-usab sa  spelling sa imong pangan ug 3) uban pang dokumento nga pangayuon sa Local Civil Registrar alang sa pag-aprobar sa imong Petition. Ang Civil Registrar mao na unya ang moduso sa imong records ngadto sa NSO aron makurihian ang spelling sa imong pangan. Hinaut nga akong natubag ang imong mga pangutana. Daghang Salamat ug Happy New Year!

Alang sa inyong mga pangutana, ipadala lang sa Legal Corner sa Banat News sa V. Gullas Street,  Cebu City or email sa [email protected] ug akong tubagon ang inyong pangutana pinaagi sa akong column matag adlaw’ng Miyerkules ug Domingo.