Lig-ong lider ba si JVR?

Ang karaang merkado sa Tabunok, Talisay City gabok na. Gawas sa mga dagkong liki, may mga kabilya na usab nga nangabawog timaan nga dili na worth puy-an sa pagpaninda. Kini sumala pa sa mga ekspertong structural engineer nga mi-check up niini.

Gumikan ning delikadong kahimtang sa building mimando si Mayor Johnny V. de los Reyes (JVR) sa mga tindera nga pabiyaon sa maong dapit sa labing dali nga panahon. Kay anytime, posible kaayo kining mahugno, samot nag pirmeng agia’g aftershocks.

Apan wala gyud tahora ang order sa mayor. Mura’g gipapitla’g rugby ang hunahuna. Hala, paugat lang gihapo’g paninda!

Makapahibulong. Gipanghambog sa mga Talisaynong supporter nga si JVR kuno nga ilang mayor, buotan. Unya buotan man kaha nganong ila man kining gisupak? Nagpasabot ba kini nga under nila ang mayor ug sayon ra kaayong gawngan?

Ning kakulang sa kaisog sa pagpahawa niining mga badlungong tindera, klaro baya nga nahadlok si JVR nila. Klaro kaayo nga kini si JVR walay command of responsibility. Apan taym pa, nahibalo ba sab kaha si JVR kun unsa kining  ‘command of responsibility? Nasayod ba kaha siya nga kun unsay mahitabo sa mga kinabuhi nga matabonan ini’g kahugno sa gabok nang merkado sa Tabunok, iyaha gihapon kining tulobagon? Unsa ba gyud diay ang importante, ang kinabuhi sa iyang ginsakpan o ang kahadlok nga mapilde sunod eleksiyon?

JVR, isip usa ka mayor, may gahom ka paghimo’g executive order nga magpugos sa mga vendors sa pagpapahawa ning dapit nga nagmahulgaon pagkutlo sa ilang kinabuhi. Kay kun dili mo sila mabadlong, sama ra nga gipasagdan mo silang maghikog. Ug timan-i. Usa baya ka mortal sin ang paghikog. Unya, di nimo sila ilikay? Gamita ang imong authority sa pagka-amahan sa lungsod, Mayor!

Kay kun ang imong tingog, Mayor wala’y igong gahom nga makapaturok og respeto sa katawhan, kinsa imong gidumala, klaro na kaayo unsa ang tukmang tubag kun may intelihenteng nagpakabana nga mangutana: “Usa ba ka lig-ong lider si JVR?