Ang gitugot ug gidili nga mga pabuto

Ang nagkadaghan nga mabiktima sa pabuto sa matag tuig nga pagsugat sa Pasko ug Bag-ong Tuig maoy nakaaghat sa kagamhanan sa pagpatuman sa balaod nga Republic Act 7183 nga gitumong alang sa pag-regulate sa pagpamaligya ug  pagpamuhat niini.

Sa pagpatuman sa maong balaod nga RA 7183 mao nga gawasnon ang katawhan sa pagpamuhat, pagpamaligya o paggamit og pabuto sanglit giisip na man kini nga kultura ug tradisyon sa katawhang Pilipinhon apan mosubay lamang sa mga lagda nga gilatid sa kagamhanan sa paglikay sa kadaut ug paghatag og kasiguroan.

Ang Section 2 sa maong balaod nga RA 7183 maoy giila ang mga common types nga mga firecrackers o pyrotechnic devices nga gipamuhat ug hangtod na nga gipamaligya sa pagsugat sa Pasko ug Bag-ong Tuig.

Sa paghingalan sa nagkalainlaing matang sa mga pabuto mao ang naglakip sa Baby rocket, bawang, small riangulo, pulling of strings, paper caps, el Diablo, watusi, Judha’s belt, sky rocket o kwitis, sparklers, luces, fountain, jumbo regular and special, mabuhay, trompillo,airwolf, wishle device, butterfy ug uban pa.

Gilatid sa maong balaod ang gitas-on ug gidak-on sa maong matang sa mga pabuto ug ingon man usab ang gidaghanon sa ibutang nga pulbora nga dili mosubra sa usa ka kutsara ang  gidaghanon niini.

Ang mga namuhat sa maong matang sa pabuto kahatagan lamang og pagtugot kun makabaton usab kini og lisensiya  o permit nga pagaluwatan sa buhatan sa kagamhanan nga maoy gitahasan sa paghimo og higpit nga pakisusi ug pag-monitor nga naglakip na sa firearms and explosive unit sa kapolisan ug buhatan sa kabomberohan.

Dugang pa niini sa mao gihapong balaod ubos sa Section 3 maoy gidili kadtong nagkadaiyang matang sa pabuto nga wala mahisgoti sa Section 2 nga naglakip na sa super lolo, piculo, goodbye Philippines, Super Yolanda, Napoles ug uban pa.