Ang shabu ug marijuana sa Sugbo

Ang shabu ug marijuana mao gayod ang mga nag-una sa mga illegal nga drugas dinhi sa Sugbo ang nakasinati na og hilabihan nga pagkuyanap kay kaniadto nga nasentro lamang sa dakbayan ang operasyon  nahidangat na man kini ngadto sa mga hilit nga kabarangayan sa atong nasud nga Pilipinhon.

Kun maghisgot kita og shabu daw bation nato ang katingala kun asa man gayod kini  gikan kay   ang mga intelligence personnel wala man sila masayod kun diin man gayod kini maggikan nga maoy nagsilbi niining  tinubdan.

Matud pa nila nga ang marijuana dili man lisod ang pag-ila sa tinubdan kay gitanom man kini sa mga bakanting luna sa kabukiran dinhi sa lalawigan sa Sugbo.

Dako kaayong sukwahi sa illegal nga drugas nga shabu kay  kun walay laboratoryo sa shabu dinhi sa Sugbo labing siguro nga ang tinubdan niini gikan gayod sa dapit nga gawas na sa Sugbo.

Dugang pa nila nga kun gikan sa laing dapit nga gawas sa Sugbo ang shabu duha lamang ang mahimong agianan sa magdala niining mga tawo ug kini mao ang Mactan Cebu International Airport (MCIA) ug kadagatan nga naglakip sa mga pantalan.

Ang maong mga lugar higpit kaayo ang pagbantay apan bisan pa man niini sa gihapon nagpadayon ang pagkuyanap niini.

Gitataw nila nga ang makapahibulong kay nagpadayon man gihapon ang pagkuyanap sa illegal nga drugas kay gani daghan man gihapon ang mga nalambigit niini hangtod karong panahona.

Gani dili pa lang dugay sa barangay Jubay sa lungsod sa Liloan  laing suspetsado nga nalambigit sa pagpayuhot ang namatay dihang gikaengkuwentro ang kapolisan nga nagpahigayon og operasyon. Ang namatay mao si Elias Gulane, 41 anyos nga napusilan sa mga sakop sa Provincial Intelligence Branch nga napusilan nga maoy hinungdan sa hinanaling kamatayon ug nasakmit ang P50,000 nga kantidad sa shabu nga dala niini.

Ang maong panghitabo maisip lamang nga tipik  ug kabahin sa nagpadayong pagkuyanap sa illegal nga drugas dinhi sa nasud nga  mosangko gayod ngadto sa kaalautan.