Nagkawilkawil nga kable

Usa sa mga gasa nga akong nadawat karong Paskoha mao ang power bank. Nga way klarong brand gawas sa nabantang nga "Made in China." Way giya unsaon paggamit. Kinahanglan pa kong magpalaban sa Google aron makasabot nga di siya charger ni dugang nga baterya. Kun dili mora gyong bangko nga mopundo og enerhiya alang sa cell phones, tablets, speakers ug ubang gadgets nga ma-charge pinaagi sa USB.

Akong nabasahan nga ang kapasidad sa power bank katumbas sa napu ka baterya sa cell phones. Sa ato pa makapatuyang ko og gamit sa tanang gadgets sa lagyong biyahe nga di na kinahanglang mangita og katuslokan nga suplay sa kuryente.

* * *

Naabtan og kapin sa 24 ka oras nakong charge una napuno ang power bank. Gisuwayan dayon nako pag-charge ang tanan namong gadgets. Way problema. Dali ra kaayong napuno. Wa ra katunga sa pundo nga enerhiya ang nakuha. Giluklok dayon nako sa gamay’ng bag uban ang pagtuo nga makalahutay sa taas nakong biyahe paingon sa Palompon, Leyte, ang lungsod nga akong natawhan, aron pagtabang pag-apud-apod sa mga hinabang nga natigom sa Kapamilya Relief Campaign.

Padung pa ko sa pantalan sa pagsuwat ini. Suginlan mo nako nagsilbi bang power bank sa sunod higayon. Nahasol hinuon ko sa kadaghan sa kable nga kinahanglan nakong dad-on aron ma-charge ang nagkalainlaing gadgets.

* * *

Kun naka-imbento na sila og power bank, nganong wa pa man makahapsay sa managlahing kable sa charger? Ang Android na maoy dominante nga operating system sa cellphones ug tablets ug ubang gadgets apan nagdumili ang Apple, nga maoy nakauna sa industriya, sa pagpahaom sa ilang iOS. Kinsa may unang mamilok? O padayong silotan ang mga konsumidor sa pansit nga mga kable? Usa sa akong gibitbit mao ang gamay’ng bluetooth headset, lain nakong gasa karong Paskoha. Labihang gamaya sa headset nga mas dako pa ang kable nga mosumpay sa charger. Kun may wireless nang headsets ug speakers nganong wa pa man palamboa ang wireless nga chargers?

* * *

Nimando nang European Union nga sagupon sa Andorid ug iOS ang managsamang charging system. Apan kinahanglan pang aprobahan sa sakop nga mga nasud sa Marso sa bag-ong tuig. Kun maaprobahan himoan og mga balaod sa nagkalainlaing kanasuran sa mosunod nga duha ka tuig. Hatagan og usa ka tuig ang mga tighimo og cell phones ug tablets ug ubang gadgets pagsunod sa bag-ong sistema.

Tulo pa ka tuig tang mag-antos sa managlahing chargers. Nga padayong mosangpot sa kausik sa kuryente ug sa dakong kadaot sa kalikopan. Ug sa dugang wa kinahanglana ug gipaburot nga gastohan sa mga konsumidor. Duna na tuod koy power bank ug duwendeng headset apan kinahanglang magbitbit sa nagkawilkawil nga mga kable.

* * *

Email: [email protected]