Kumusta imong Pasko?

Ang pagsaulog sa Pasko, walay kondisyon. In fact, sa gusto ka’g sa dili, sa motuo ka’g dili, ma-aduna kay pinaskohan o wala, ma-buwagan ka sa imong uyab o kabit o magpadayon ang inyong relasyon, mahubog ka’g sa dili, makatambong ka’g party o dili, mawad-an ka’g trabaho o dili, nabiktima ka ni Yolanda o wala, nakadaug ka sa tigbakay o wala, nakadawat ka’g bonus o wala, naka-exchange ka o wala …. bisan pa ug taliwaa niining tanan … magpadayon gyud ang Pasko. Kaylagi, dili kondisyonal, dili ma-postpone ug dili ma-kanselar ang Pasko.

Dili moingon ang Batang Hesus nga iya lang unang iuswag ang iyang pagkatawo, hangtud nga maarang-arang ang imong pagkabutang. Busa, Merry Christmas kanatong tanan!

* * *

Sa region 6, ang lalawigan sa Negros Occidental, napili na usab nga Best Performing Province sa Western Visayas. Mao usab kini ang ilang naangkon nga pasidungog sa miaging tuig. Ang category naglangkob sa Excellence in economic governance, Environmental governance, ug Valuing the fundamentals of good governance.

Dinhi sa region 7, kumusta man ang atong lalawigan ug dakbayan?

* * *

Giingon nga sa gahom nga gihatag ngadto kang Ping Lacson isip top guy sa rehabilitation and recovery efforts sa gobyerno, matud dinhi: “he can go after local executives benefitting from Yolanda rehabilitation,” sa walay pagtan-aw sa bulok sa politika. Mao kini ang pasalig sa Malacañang.

Hinaut nga mao kini ang mahitabo, tungod kay makauuwaw kaayo ang nahitabo nga kono adunay mga local executives ang nagpahimulos sa relief operations, diin adunay mga hinabang (labi na mga foreign aid) nga wala mahiabot ngadto sa intended nga biktima ni Yolanda.

Gawas sa mga hinabang pinansiyal gikan sa gawas, ang atong gobyerno migahin og P140 bilyones alang sa rehabilitasyon. Daku kaayo ang maong salapi. Makatintal. Tahas kini ni Lacson nga kinahanglan wala’y mahisalaag sa maong kantidad.

Ug matud pa, ang tsunami rehabilitation expert sa Indonesia ug sa Japan, sa iyang pagduaw sa Tacloban City, mipasidaan nga ang kontra sa reconstruction mao ang corruption. Maoy hinungdan nga nagmalampuson sila sa ilang rehabilitation efforts tungod kay ilang gilikayan ang corruption.

Hinaut nga mao usab kini ang mahitabo sa atong nasud. Si Lacson, kun unsa man ang imong impression ngadto kaniya, wala siya mahilambigit sa mga isyu sa corruption kun pagpangawkaw sa salapi sa lungsod.

In fact, usa siya, kauban ni Sen. Joker Arroyo, ang wala modawat sa pork barrel. Kahinumdom ko nga si Butch Aquino, sa iyang pagka-Senador, wala usab modawat sa pork barrel.

Busa, with Lacson on top of the rehabilitation effort, makasalig kita (we hope) nga walay mapisik nga salapi ngadto sa naghinamhinam ug naglaway (tingali) nga mga local executives nga maka-dip sa ilang mga fingers ngadto sa dakung gahin alang ning maong katuyoan.