Abusado

Nahimong sumsuman sa nagkadaiyang social networking sites ug sa mga programa sa radyo ug telebisyon ang gihimo ni Mayor Junjun Binay sa Makati nga pagpadakop sa mga gwardiya sa usa ka subdivision didto sa kaulohan tungod sa wala pagtugot nga makaagi ang iyang convoy.

Ug tungod kay pinuy-anan sa mga adunahan ang maong subdivision, hitsas ni sa CCTV camera nga maoy nidokumento sa tibuok panghitabo.

Sigun sa makita sa nikatap nga video, wala tugoti sa mga gwardiya sa Dasmariñas Village didto sa Makati nga moagi ang convoy ni Binay sa usa sa mga gate sa subdivision.

Matud sa mga gwardiya dunay balaud ang subdivision nga sirad-an ang maong gate ig-abot sa alas 10 sa gabii.

Sanglit lapas na sa alas 10 dihang buot unta moagi ang convoy hinungdan nga wala gyud moabli ang mga gwardiya.

Nikanaog si Binay ug gitulisok ang mga gwardiya, misunod ang iyang mga bodyguard nga nihulbot sa ilang mga armas apan wala gihapon sila ablihi.

Niabot ang mga pulis sa Makati ug mipugos  pagdakop sa tulo ka gwardiya.

Ang maong insidente nahitabo niadto pang Nobiyembre 30 apan karon lang bag-o nigawas sa media. Kini maoy hinungdan nga ang kampo sa mga Binay mipasumbingay dayon nga dunay nagpahipi nga motibo sa politika.

Ila sab nga gihimakak ang pasangil nga gidakop ang mga gwardiya ug gipasabot ang pagbunot og pusil sa mga bodyguard sa mayor.

Matud sa kampo ni Binay nga igo lang giimbitar ang mga gwardiya didto sa buhatan sa kapolisan ug ang pagbunot og pusil sa mga bodyguard pangandam lang tungod kay gialirongan kuno sila sa mga gwardiya.

Apan dili ni maoy makita sa video. Ang video nagtug-an nga sila si Binay maoy nialirong sa mga gwardiya ug gipugos kini pagdala sa kapolisan.

Bisan sa tataw nga pag-abuso sa iyang anak, si bise presidente Jejomar Binay labihang nakalaban sa iyang anak.

Matud niya angayan kunong gihatagan og courtesy sa mga gwardiya ang iyang anak isip mayor sa Makati.

Unsa may ipasabot sa bise presidente nga silang mga opisyal mamahimo nga di mosunod sa mga lagda?

Labaw kay ni bisan kinsa, ang mga sulogoon sa publiko sama nilang Binay angayang maoy mohatag og ehemplo pagsunod sa mga lagda.

Gani ang ubang mga opisyal nga mas dako pa og posisyon nga gihuptan kay sa mayor nitahod sa mga gwardiya ug sa lagda sa subdivision. Ang Dasmariñas Village pinuy-anan ni nilang Senador Juan Ponce Enrile, kanhi speaker Jose De Venecia ug daghan mga diplomat sa ubang nasud.

Ang hitabo nagpakita unsa nga matang sa pagkatawo ang mayor ug ang iyang amahan nga milaban hinuon inay badlungon ang tataw nga pag-abuso sa iyang anak.