Ingon ana sila sa Makati

Abunda ang mga lusot sa mga Binay sa pagpamugos ni Makati City Mayor Junjun Binay paggawas sa gitak-opan nga gate sa Dasmariñas Village ug sa iyang pagpadakop sa mga guwardiya nga nibabag sa iyang agianan. Apan daghang salamat sa pagbarug sa kaligdong atubangan sa daghang pamakak nabuko ang tanan nilang pangulipas.

Ang una nilang lusot nga gisupak sa mga guwardiya ang VIP policy sa Dasma pagpaagi sa tinak-opan nga gate sa dagkong mga opisyal sa gobyerno sama sa presidente, bise presidente, embahador ug mayor sa Makati gisukwahi sa inilang mga molupyo sa subdivision nga naglakip ni kanhi Neda secretary general Solita Monsod kinsa niinsistir nga dugay na kaayong lagda nga way makagawas sa nahisgutang gate lapas sa alas-10 sa gabii.

* * *

Ikaduhang lusot sa mga Binay mao nga gilibotan sila sa mga guwardiya sa Dasma maong napugos ang bodyguards ni Mayor Binay sa paggawas sa mga sakyanan ug pagpaggawas sa tag-as nilang mga armas. Apan ang video gikan sa CCTV camera sa Dasma nga gi-upload sa YouTube nagpakita nga duha ra ka guwardiya ang nahimutang sa guard house. Mas daghan ang mga kuyog ni Binay.

Labihang daghana sa bodyguards ni Mayor Binay nga usa nila wa nang kahibawo unsay buhaton-nidali pagkuha og payong gikan sa sakyanan ug gipandongan ug gisunodsunod si Mayor Binay sa iyang pagpaso-paso duol sa guard house bisan way init kay hapit nang tungang gabii ug bisan way uwan.

* * *

Ikatulong lusot sa mga Binay mao nga wa ipadakop ni Mayor Binay ang mga guwardiya kay boluntaryo silang nikuyog sa kapolisan ug nga wa tanggonga sa Makati City Police Station sud sa upat ka oras ang mga guwardiya kay igo ra nga naglami ang ilang istorya sa mga polis.

Gibuko ang lusot sa mga Binay sa hepe mismo sa Makati City Police Office kinsa niingon nga gidis-armahan nila ang mga guwardiya ug gisukitsukit mahitungod sa ilang engkuwentro sa convoy sa mga Binay samtang gipatawag ang mga opisyal sa barangay.

* * *

Kay nabuko na man ang tanang lusot, gipagawas ni Bise Presidente Jejomar Binay ang alas nilang lusot-iyang anak nga si Junjun maoy mayor sa Makati City diin nahimutang ang Dasmariñas Village busa angay lang nga hatagan og kurtesiya.

Mao ray gidangat. Sama rang gideklarar sa hamtong nga Binay nga, "Unsaon ta man kun way VIP policy nga maablihan ang gitak-opan nang gate, nga mayor mang akong anak? Unsaon ta man kun iyang gipadakop ang mga guwardiya ug unsaon ta man kun gitanggong sila sa mga polis sud sa upat ka oras, nga mayor man sa Makati ang akong anak? Unsaon ta man kun nalapas namong balaod, nga ingon ini man gyod mi sa Makati?"

* * *

Email: [email protected].