DSWD wa moangkon sa pasangil

Gihimakak sa taga DSWD ang pasangil nga gipakatap sa Facebook sa usa ka Cherry Mae Pancho Bartolata, diin matud pa niini nga ang mga relief goods nga gipadala sa Indonesia alang sa mga Yolanda typhoon victims gipaparepak pag-usab bisan dili na angay sanglit ready for distributions na man kini daan. Si Bartolata, usa sa mga volunteers sa DSWD Repacking Center, Mactan, nga mi-walk out kay wala makaayon sa ilang na-obserbaran.

Nangatarongan ang DSWD nga ila kunong obligasyon ang pagtsek-ap sa mga sulod sa bag aron masuta kun ang mga canned goods dili ba expired ug wala bay botelyang mangabuak. Nindot ang ilang rason.

Ang pangutana mao: “Nganong gibalhin man nila ang mga relief goods og laing plastic bag nga may tatak: ‘DSWD’? Unta ang itatak: ‘Indonesia’? Kay sila gud ang tag-iya sa maong donasyon. Dili man kini ato. Unya nganong angkunon man kini sa DSWD?

Nasayod ba kaha ang DSWD, no, nga kining ilang gibuhat sama ra nga gitulis nila ang Indonesia sa atubang? Daghan pa gyud ang nakasaksi — ang mga volunteers!

Kablit lang. Bisa’g unsa ang naa sulod sa orihinal nga sudlanan, wala gyu’y katungod ang DSWD sa pagbalhin niini ngadto sa laing plastic. Miingon ang DSWD nga basi’g dunay mabuak, o expired na ang sulod? Okay, maayo man ang maong tumong. Pero, ayaw ibalhin! Ibalik pagbutang kun diin kini gikan. Gani matud pa sa mga volunteers, mas lig-on ug guwapa man ang orihinal nga mga sudlanan nga gigamit sa Indonesia kay sa baratohong plastic bag nga giilis sa DSWD.

Ug labaw sa tanan, dili tingali buang ang Indonesia nga magpadala’g mga pagkaong hinabang nga makahilo na. Nagtan-aw gud ang tanang mata sa kalibotan ning maong kalihokan. Kining gihimo sa DSWD makapasakit baya ni sa Indonesia, do! Tiaw bay, wa ta mosalig sa ka-safety sa ilang gihatag? Tiaw bay, ang kaluoy nga ilang gitunol, giilisan nato’g pagduhaduha?