Kalimti na ang piniliay

Subo nga palandungon nga bisan milabay na ang piniliay sa barangay nagpabilin gihapon ang kalaa niini.

Sa akong pagsuroy-suroy sa hapit na 80 ka barangay sa dakbayan sa Sugbo akong nakita nga aduna gihapo’y mga piniling opisyal sa barangay ang dili magkatinan-away tungod kay gikan sila sa managlahing grupo sa ilang pagpapili.

Gawas nga adunay mga napili nga dili magkatinan-away, aduna usa’y mga naparot sa piniliay nga dili ug wala pa gayod makadawat sa ilang kaparotan. Kini ang hinungdan nga naapiktohan ang ilang pagpangalagad. Kini usab ang hinungdan kun nganong nahikawan ang katawhan sa maayong pagpangalagad.

Angayang hinumdoman sa tanan nga ang pagpapili boluntaryo nga pangalagad ug kay boluntaryo dili nato ikasuko kun wala kita pilia sa mga tawo. Kay boluntaryo nga pagpangalagad ang pagpapili, ang mga midaug maghiusa na alang sa tanan ug kalimtan na ang piniliay.

Alang sa kaayohan sa tanan ug maayong pagpangalagad sa katawhan, ang tanan alagaran mibotar man kanimo o wala. Kay ang piniliay usa sa mga esensiya sa demokrasya ayaw kasuko kun wala ka pilia ug ayaw upod usiki ang higayon nga gihatag kanimo sa katawhan aron ka mangalagad pinaagi lang sa pagbaton og kaligutgot sa imong mga kaatbang sa politika.

* * *

Ugmang adlawa atong masayran kun kinsa gayod ang mogawas nga mananaug sa proxy war tali ni Mayor Mike Rama ug kanhi kongresista Tomas Osmeña pinaagi sa ilang mga manok sa Association of Barangay Council (ABC) election. Sila si Kapitan Philip Zafra sa Tisa ug Manuel Guanzon sa Capitol ang giingong magbangga sa pagka pangulo sa ABC.

Si Zafra suportado sa 50 kapin ka mga kapitan nga kaalyado ni Mayor Mike Rama samtang si Guanzon suportado usab sa mga kapitan nga kaalyado ni kanhi kongresista Tomas Osmeña. Giingon nga ipakita sa mga BOPK nga anaa pa gihapon ang ilang kusog sa piniliay ugmang adlawa.

Kun unsa sila ka kusog ato ning masayran ugmang adlawa busa atangi!