Ganti sa kagahi sa ulo

Kun duna pa may nahibiling pagduda nga ang kampanya batok sa pangurakot ni Presidente Noynoy Aquino gitumong lang batok sa iyang politikanhong mga kaatbang, bisan giapil na og kiha sa pork barrel scandal ug gitangtang na sa katungdanan si kanhi customs commissioner Ruffy Biazon ug bisan ang mga tinudlo ni Aquino sa Korte Suprema niapil og basura sa pork barrel system, mahimong hingpit na gyong mapapas ning labing uwahing kamandoan sa Commission on Elections.

Gipakanaog sa Comelec gikan sa katungdanan sa kapin sa 400 ka kongresista ug lokal nga mga opisyal nga napakyas pagsumiter sa ilang Statement of Contributions and Expenditures (SOCE). Apil nang labing suod nga mga alyado sa politika ni Aquino.

*  * *

Naapil tuod sa listahan si Kongresista Gloria Macapagal-Arroyo, nga igo nang sukaranan sa pagtulisok sa Malakanyang nga way laing nahimo gawas sa pagpanggukod sa napulihang pamunoan aron paglipat sa katawhan gikan sa kapakyas ni Aquino paghimong mas maayo sa ilang kahimtang.

Apan naapil sab sa listahan ang gobernador sa Batangas nga si Vilma Santos, asawa sa dakong haligi sa Liberal Party nga si Senate Presidente Pro Tempore Ralph Recto, ug Kongresista Rodolfo Biazon sa Muntinlupa, nga gawas nga amahan sa kanhi customs commissioner maoy usa sa mga bayani sa pagluwas ni anhing presidente Cory Aquino gikan sa diriyot molampos nga kudeta ni kanhi rebelde karon Senador Gringo Honasan.

* * *

Ang maayong balita mao nga way bisan usa ka kongresista sa Sugbo, Bohol, Negros Oriental ug Siquijor nga naapil sa gihinginlan sa ilang mga buhatan. Silang tanan nakasumiter sa SOCEs ngadto sa Comelec sa gitakdang panahon.

Apan naapil ang 11 ka konsehal sa Sugbo: Sa Mandaue City nga silang Editha Cabahug ug Tony Dabon; sa Danao City nga silang Jed Almendras, John Cane, Ivy Durano-Meca, Cynthia Duterte, Jove Enriquez, Celso Meca ug Jojo Roble; sa Sta. Fe nga si Louwela Pacilan; ug sa Tabogon nga si Rodrigo Sinoy. May naapil sang mga konsehal sa Bohol, Negros Oriental ug Siquijor.

* * *

Tinuod nga ubos sa balaod independente ang Comelec gikan sa pagdiktar sa Malakanyang. Apan wa ning kapugong sa mga kaatbang ni Aquino sa pagpasangil nilang Comelec Chairman Sixto Brillantes Jr. ug kaubanan nga mga itoy sa LP. Hinaot nga moarang-arang ang ilang pagtan-aw tungod sa kaisog nga gipakita sa Comelec.

Di hinuon hingpit nga mapalagpot sa puwesto silang Arroyo, Santos, Biazon ug laing 416 ka mga opisyal. Kay kasamtangan ra sila nga gipakanaog. Makabalik sila sa katungdanan kun makasumiter na sa ilang gipaigot pag-ayo nga SOCEs. Hinaot nga igo na ning pahinumdom, kun simbako wa pa gyod kamatngon sa tinuoray’ng implikasyon sa pagkapapas sa pork barrel, di na silang kapatuyang sa ilang gibati.

* * *

Email: [email protected]