Anti-loitering ordinance

Ambut mahimo ba ni dinhi sa ato, kining gihimo sa Los Baños, Laguna pagdili sa pagsuroy-suroy gikan sa alas 12 sa tungang gabii hangtud alas 4 sa sayong buntag. Gumikan sa nagsunodsunod nga kriminalidad niining gitawag nga university town, ang konseho sa Laguna naaghat pagpalusot sa anti-loitering ordinance.

To loiter, sa ilang ordinansa, is “to linger or hang around in a public place or business where one has no particular or legal purpose.” Sa ato pa, waa kay tuyo sa usa ka lugar, nagbagdoy-bagdoy lang, nagsuroysuroy lang, nag-istambay lang, nagpalabay lang sa panahon, you are loitering. Niining mga taknaa, from 12 midnight to 4 am, you are supposed to be sleeping already, or at least, nauli na ka sa balay.

Ang first offender, o unang pagsupak sa ordinansa, dad-on sa barangay hall, kuhaan sa personal information sama sa ngalan, edad, address, trabaho ug ubang kasayoran, ug lektiyoran bahin sa existing ordinance.

Ang second offender, dad-on sa police station for custody lang, sa ato pa, dili ka ikiha, dili ka kulatahon, dili ka unsaon, anha lang ka papahuwaya sulod sa police station, lagmit hatagan ka’g katol. Apan inigkaugma, paalagaron ka sa barangay, sulod sa upat ka oras, community service, sama sa pagpanilhig sa kadalanan, pagpangguna, I hope, dili pagpanglimpiyo sa pansayan.

Ang third offender, multahan nag P500 o bilanggo sa dili molapas og 30 ka adlaw, sigun sa discretion sa hukmanan.

Sa ato nang giingon, ang konseho sa Los Baños napugos pagpalabang ning maong ordinansa gumikan sa naghitak nga krimen nga nanghitabo sa university belt, kasagaran sa mga biktima mga estudyante, ug nanghitabo gikan sa alas 12 sa tungang gabii hangtud alas 4 sa buntag.

Usa ka estudyante sa UP Los Baños gilugos ug gipatay; laing estudyante gipusil patay; lain pa gyud nagtungha sa Los Baños High School, babaye, gipatay, ug laing estudyante gidunggab sulod sa boarding house - gikawat ang laptop.

Mahimo ba kaha ni nato dinhi no? Lisud. Curfew alang sa mga batan-on. Hapit na ra ba makada-adlaw ang mga panghitabo sa kriminalidad dinhi sa atong dapit.

Ug sa Metro Manila, ang National Capital Region Police Office (NCRPO) miluwat og kasugoan nga nagdili sa ilang mga sakop pag-rekisa sa mga motorista panahon sa ilang police operation sama sa pagpasiugda og checkpoints.

Matud dinhi, atong kutluon: “Police officers should not ask the driver or occupants of the vehicles to move out and frisk them.” So, gidili nila didto sa kaulohan ang pag-rekisa. Ug lagmit, mao usab kini dinhi sa ato, kay sa mga checkpoints nga ilang gihimo dinhi, kasagaran sa mga motorsiklo lang.

Kasagaran sa mga kriminalidad nag-involved gyud og mga motorsiklo. Maayo  tingali mag-random checkpoint, dili ipahibawo, kalitkalit lang, sa mga awaaw nga dapit, panahon sa kagabhion. Kun magbutang og karatola, ma-alarm man ang mga criminal elements, ug molikay. What about checkpoints between 12 mn to 4 am?