Tua na ang barko nga puno og bugas

Mikawat pa gyud og paggawas og katapusang kamandoan si Customs Commissioner Ruffy Biazon pagpa-release sa hapit 16,000 ka sakong bugas humay karga sa MV Queen of Joy gikan sa Manila International Containerized Port (MICP), bisan wala pa maklaro ang mga papeles niini sa Bureau of Customs – Port of Cebu.

Nahingangha na lang si Customs Police Cebu chief Major Camilo Cascolan Jr. sa iyang nahibaw-an nga ang barko milawig og dalidali paingon sa Isabel, Leyte nga wala gani pahibaw-a ang iyang buhatan.

Duha ka mga sakop sa Customs Police sa Sugbo nga gidestino sa pagbantay sa barko mipabuto isip warning shots aron dili unta palargahon ang MV Queen of Joy, apan wala kini panumbalinga sa mga tripulante.

Angay imbestigahon ang pagpa-release sa maong mga bugas. Wala pa makapresentar ang tag-iya niini og clearance gikan sa Department of Social Welfare and Development (DSWD) ug shipping permit gikan sa National Food Authority (NFA).

Gusto usab untang mahibaw-an sa Customs Police kinsay “donor” (midonar) ug “donee” (modawat) sa maong mga bugas.

Una nang gipamahayag ni Isabel Mayor Marcos Gregorio Cerillo nga ang maong mga bugas ipanghatag sa mga biktima sa bagyong Yolanda sa iyang lungsod, uban (kuno) sa mga relief goods gikan kang Senador Alan Peter Cayetano.

Wala koy problema sa mga imported nga bugas nga paliton gyud sa usa ka dakong kompaniya sa mga fertilizer sa Isabel, Leyte aron lang gyud ipanghatag sa mga biktima sa bagyo. Apan miapil ko sa pagkuwestiyon nganong dinhi gidunggo ang MV Queen of Joy sa Pier 2 sa Sugbo unya adunay pagsulay og diskarga, nga adto man kaha kini ipanghatag sa Leyte.

Kun wala lang kuwestiyona sa Customs police ug sa media ang presensiya niini, wala’y mga politiko, mga sakop sa militar ug mga negosyante ang naninguha pagkumbinser sa BOC-Cebu nga alang kini sa mga biktima sa bagyo.

Usa sa ngalan nga mitumaw niining maong kargamentoha mao ang kang Senador Cayetano, kay sa adlaw nga nagpa-presscon dinhi sa Sugbo si Mayor Cerillo ug ang ABC president sa Isabel niadtong duha ka Sabado ang nakalabay, dinhi usab nianang adlawa si Senador Cayetano.

Ang gitawag og “prior requirements” sama sa DSWD clearance ug NFA shipping permit wala gyud maabot, hangtod mimando na lang si Customs Commissioner Biazon nga buhian ang maong kargamento.

Kun nakahinumdom kamo, sa gabii sa Noche Buena niadtong 2001, naka-eskapo ang MV Great Faith nga adunay kargang 20,000 ka sakong smuggled nga bugas gikan sa gidunggoan niini sa Ouano wharf.

Mga opisyal sa Customs gipangkasohan - wala’y labot kadtong mga dagkong tawo, gani ang uban nakabalik pa sa puwesto – tungod sa pagkahanaw sa maong barko.

Sa pagkabasa nako sa balita nga gibuhian ni Biazon ang MV Queen of Joy, nanglimbawot akong balahibo, ug wala ko maka-eskapo paghunahuna sa nahitabo sa MV Great Faith.

Ug nakapangutana dayon ko: Wala ba kahay nakakuwarta niining maong transaksiyona?

* * *

Daghan ang gi-usikan sa pagtak-op sa Cebu Investment Promotion Center (CIPC) sugod sa katapusan ning bulan sa Disyembre tungod sa kakulangan sa suporta sa kagamhanan sa siyudad sa Sugbo.

Kining CIPC gitukod sa panahon ni kanhi mayor Tomas Osmeña aron maoy mo-promote sa Sugbo, ilabi na sa South Road Properties (SRP) isip investment haven. Mo-20 na unta ka tuig kining CIPC sa sunod tuig, apan tungod lang sa politika, maundang kini.

Dili gyud hinuon makapaabot og suporta ang CIPC sa administrasyon ni Mayor Mike Rama. Ang administrasyon ni Mike naghimo og kaugalingong sentro nga mag-promoter sa SRP ug managlahi man ang baruganan ni Tomas ug ni Mike kalabot sa SRP. Apan apil ko sa gi-usikan sa CIPC.

* * *

Human miingon si Deputy Ombudsman Pelagio Apostol nga ilegal ang kampanya nga “piso-piso” ni Mike alang sa pagpatukod sa bag-ong edipisyo sa Cebu City Medical Center (CCMC), ang DSWD na mismo ang miingon nga dili kinahanglan ang permit gikan sa ilang buhatan ang kagamhanan sa siyudad sa Sugbo alang sa fund-raising campaign niini.

Ang maayo niini adunay mo-challenge sa gibuhat sa siyudad sa Sugbo. Apan hangtod karon, wala’y mibarog pag-kuwestiyon niini sa korte.

Bahala na lang nang permit sa DSWD, ang ako lang nga aduna untay “transparency” ang pagpangolekta og sensiyo sa siyudad sa Sugbo gikan sa mga tawo aron ipatukod og bag-ong ospital.

Dili ko mamasangil, apan mas nindot ug mas daghan ang ma-engganyo sa paghatag kon “transparent” ang fund-raising.

Naghisgot kita og P1.5 bilyones nga pundong gikinahanglan aron matukod ang bag-ong ospital. Apan wala modangop sa kuwarta sa gobyerno ang pamunoan ni Mike.

Midirekta og kangkang si Mike ngadto sa mga tawo aron tabangan iyang kawsa nga matukod ang bag-ong ospital sa katawhan. Busa angay usab kining bantayan.