Unsay buhaton kun ang kaminyuon wa makatuman sa gilatid sa Family Code

Ang kaminyuon makonsiderar kining balido bisan pa kun adunay mga rekisitos nga gilatid sa Family Code alang sa mga tawong magpakasal nga wa matuman sama pananglit sa Marriage License. Bisan kun wa magpuyo isip magtiayon o pamilya ang gikasal magpabilin usab gihapong balido ang ilang kaminyuon. Apan unsa bay angayang buhaton kun ang kaminyuon gipahigayon apan wa kini makatuman sa formal ug essential requisites nga gilatid sa Family Code. Kana nga pangutana ang atong tubagon karon sa atong column.

Dear Atty. Divine;

Usa ako sa nagsunod sa imong column nga Legal Corner sa Banat News. Taga Cebu gyud ko apan  nia na ko karon magpuyo sa Mindanao. Ang akong pangutana may kalabutan sa among gihimo nga pagpa-secret marriage kaniadto sa akong hinigugma.Niadtong 1978 akong gikaila ang usa ka babaye nga maguwang nako og unom ka tuig. Nagkauyab mi sa maong babaye ug mimabdos siya sa akong anak. Tungod sa maong hitabo na-pressure ko ug miuyon ko nga magpakasal mi og sekreto. Mi-execute mi og Affidavit nga konohay kami naglive-in na sud sa lima ka tuig aron kami makasal nga di na mokuha pa og marriage license.

Gikasal mi sa usa ka mayor sa lungsod apan human sa among kasal nag-iyahay mi og pamauli. Hangtud nga mibiya ang maong babaye sa among dapit ug wa na mobalik hinungdan nga wa na mi magkita lakip na sa akong anak kaniya. Akong nasayran nga aduna nay laing pamilya ang maong babaye ug ako aduna na sab ko karo’y pamilya nga diin aduna mi lima ka mga anak.

Sa dihang mikuha ko  og Certificate of No Marriage kon CENOMAR sa NSO akong nakita nga na-recorded gyud ang among kaminyuon sa maong babaye apan ang ubang entries sa maong marriage contract kasagaran mga sayop. Ang akong pangutana karon attorney kun unsa may maayo nako nga buhaton aron hingpit gyung mapapas ang maong record nako sa NSO sa akong kaminyuon sa maong babaye tungod ug alang sa akong pamilya karon? Para nako di man to matawag gyud nga kaminyuon ang among gibuhat kay wa man gyud gani mi sukad magpuyo isip usa ka magtiayon? Hinaut nga imo kong matambagan sa angayan nakong buhaton. Daghang Salamat. — Elmo

Dear Elmo,

Salamat sa imong pagsunod sa atong column sa Banat News. Kanang imong problema nga imong giatubang karon wa gyu’y laing solution niana kun dili mao ang pagdangop sa Korte aron ipadeklarar nga void o ipa-annul ang inyong kaminyuon sa maong babaye. Bisan pa kun wa kamo magpuyo isip magtiayon sa maong babaye apan ang gibasihan man gud sa maong records sa NSO mao ang inyong pagpakasal kay human  sa maong seremonyas ang mayor nga maoy nag-solemnized sa inyong marriage miduso man sa inyong marriage contract nga gipirmahan ngadto sa Local Civil Registrar ug ang maong dokumento  giduso  usab kini ngadto sa NSO. Kun imong ipadeklarar nga void ang imong kaminyuon usa sa mamahimong basihan kon ground niini mao ang inyong kapakyas sa pagkuha og marriage license nga diin usa sa mga formal requisites sa kaminyuon basi sa Article 3 sa atong Family Code.

Sumala pa sa imong gisulti nga mi-execute mo og Affidavit of Cohabitation nga nagkanayon nga kamo nagpuyo na sud sa lima ka tuig bisan kun kini di tinuod. Ang  Korte Suprema nagkanayon nga kun ang usa ka Affidavit nga gi-execute sa usa ka party o parties hinimo himo lang o way basihanan wa kini force and effect ug makonsiderar ang maong Affidavit nga a mere scrap of paper.

Sa ato pa, kay wa may kamatuoran ang inyong gi-execute nga Affidavit, kinahanglan gyud unta kamo nga mokuha og marriage license sa wa pa ipahigayon ang inyong kasal. Ang epekto sa kaminyuon nga way Marriage License makonsiderar kining void apan nagkinahanglan kini og deklarasyon sa korte. Ang maayo nimong buhaton karon mao ang pag-adto sa abogado aron matun-an ang imong kaso ug mapasaka ang  imong Petition  aron pagpadeklarar nga void sa imong kaminyuon ngadto sa Korte. Hinaut nga akong  natubag ang imong pangutana. Daghang salamat ug God Bless.

Atty. Divine

Kun ikaw adunay pangutana, ipadala lang sa Legal Corner sa Banat News sa V. Gullas Street, Cebu City or email sa [email protected]  ug akong tubagon ang inyong pangutana matag adlaw’ng Miyerkules ug Domingo pinaagi sa akong column.