Ang dios miingon pamalandong matag domingo

Pagbag-o

Matag ikaduhang Domingo sa Adbiyento nahimong sentro sa ehanghelyo mao si Juan Magbubunyag. Kuyog sa maong tingog niya ang unod niini kalabot sa pagbag-o ug pag-usab sa kaugalingon. Gidapit niya ang matag tawo nga maghinlo sa kasingkasing uban ang pagbiya sa kinabuhi sa sala aron mahimong takus nga modawat sa manunubos nga nagpakatawo.

Ang maong panawagan padayon gihapong buhi karong mga panahona diin ang matag usa kanato ang gidapit nga himuon nato ang pagbag-o sa atong kaugalingon. Ang pagduol sa kumpisalan ug pagsinati sa kapasayloan gikan sa kahitas-an dako na kaayo og kahimoan aron mas maandam kita alang ning maong kasaulogan. Kun buot natong makab-ot ang kausaban diha sa kinabag-an, mas haom nga atong usbon una ang atong tagsa-tagsa ka mga kaugalingon.

Atong hinumdoman, matag adlaw, kahigayonan sa pagbag-o, kahigayonan sa pagpasaylo. Kini ang kahulogan sa nagsingabot nga Pasko sa pagkatawo sa Ginoo.