Fight sir Joemar!

Nindot kun tinuod nga nakakita na og sulbad sila si City Administrator Jose Marie Poblete sa problema sa kadagkoan sa Cremdec – ang City Resource Management and Development Center nga usa ka departamento sa City Hall.

Husto si Joemar Poblete nga kun ang pamaagi nga ipatuman sa Cremdec mao nga kadtong mag-training sa ilang center pabayron nila daan o kaha pahatagon og pasiuna nga bayad, aw sulbad ang problema nila sa kakuwang og budget.

Gipasabot ni Maricon Encabo, ang hepe sa Cremdec nga ang ilang problema mao ra ang pagpangita’g kwarta nga magamit sa pagpalit og makaon sa mga tawo nga anha mag-training sa ilang center. Unsaon nga sagad sa mag-training diha sa Cremdec sa Barangay Babag mga kawani ra man ‘sab sa City Hall mao nga magsalig, unya ra ang bayad human sa training, apan dugay kaayo kini makobra sa Cremdec.

Kun lihukon dayon ang gimando ni Poblete nga sa dili pa magsugod ang training asikasohon usa  daan ang tseke, masulbad tingali ang problema. Ambot mahimo ba kana sa lagda sa Commission on Audit nga bayad daan?

Buyno, apil ako motabang sa pag-ampo nga masulbad ang problema sa kadagkoan sa Cremdec.

Fight g’yud higala’ng Joemar! Maayo nga mabansay ni si Joemar sa pagsulbad sa mga problema kay magmayor ra ba ni sa ilang lungsod sa Padre Burgos, Leyte karong 2016.

* * *

Uy, mora man og nangahadlok ang mga sakop sa Philippine Drug Enforcement Agency (PDEA) human nga ang kauban nila nga gipatay kaniadtong Septiyembre.

Matud sa akong higala sa PDEA nga wala na gayud kaayo’y mga dakup nga gihimo ang ilang mga sakop human nga si Jessie Tabanao gipusil ug gipatay sa wala pa’y klaro nga mamumuno. Nangahadlok mo?

Kun wala mo mangahadlok lihuka ninyo kay mibalik na usab ang mga drug pusher sa Pulpogan, Consolacion. Dunay anak sa konsehal diha nga giingong nalambigit sa pagpamaligya’g shabu.

Ang nakapait kay basi sa report sa akong inpormer diha sa Pulpogan nga kining maong mga pusher kakunsabo sa mga polis sa Consolacion. Asa man kita makapaabot nga sila manakop nga ila man nga mga alalay? Kun duna may mga dakop, kadtong kontra sa ilang mga giprotehean ang dakpon. Dili ba?

* * *

Dunay reklamo nga kun adunay bangga sa mga sakyanan nga mga bildo mabuak biyaan ra man nga dili hiposon. Unsay mahitabo? Posible nga adunay mga tawo nga masamad. Husto ba ang inyong gibuhat?

Unya illegal nga sugal sama sa illegal swertres diha sa Sudlon, Lahug gireklamo ‘sab. Ang mga ushers kuno diha sila si Jordan, Linda, Virgie ug Marsing. Mga polis aksyoni palihug.