Pangilkil nga way kinutoban

Dihang gipasigarbo sa Cebu Port Authority ang pagkahuman sa ilang "world-class" nga passenger terminal sa Pier 1, naghinam-hinam ko sa among biyahe paingon sa Tagbilaran City sa Bohol niadtong Biyernes sa kadlawon kay moagi sa Pier 1. Pasidan-an hinuon tikang daan nga di maayo ang akong kasinatian sa mga proyekto sa gobyerno nga gihulagway sa ilang mga tigpasiugda nga "world-class."

Usa nila gigastohan og usa ka bilyon ka pesos sa buhis nga hinagoan sa mga Sugbuanon naggusbat na karon human sa linog niadtong Oktubre 15 ug bagyong Yolanda niadtong Nobyembre 8. Apan way labot ang proyekto sa kasong kriminal nga ako karong giatubang, busa balik ta sa Pier 1.

***

Nag-andam na kong daan og P25. Nga maoy gipahibawo sa CPA nga bayranan sa modernong passenger terminal. Way tawo sa booth nga gimarkahan og "Terminal Fee." Gipabalik ko sa gawas sa pantalan sa guwardiya sa CPA kay ang ticket office sa fast craft maoy modawat sa terminal fee.

Giingnan ko sa guwardiya sa ticket office nga di na ko kinahanglang mobayad og terminal fee. Kay naapil na sa plite sa fast craft. Kasayuran nga wa makuha sa tagduma sa ticket office. Kay may gitawgan pa una gitaptan og resibo sa terminal fee ang among tiket. Balik sa terminal, gipasabot ko sa guwardiya sa CPA nga wa pa maklaro ang ilang sistema.

***

Kun wa pa unta ipanghambog nga "world-class" pasar na ang terminal--hamugaway, hayag, abunda ang mga lingkoranan ug way baho--mas maayo kay sa ubang passenger terminal sa mga pantalan nga akong nasudlan. Apan tungod sa paggawal, nakakita ko sa baga nga abog sa sawog nga wa masilhig, sa janitors nga wa igkita ug sa pahibawo nga pasakyon na mi sa fast craft nga labihang hinaya nga lisod mabatian.

Napahinumdoman hinuon ko unsa ka-suwerte ang Sugbo pagkakita sa masulub-ong kahimtang sa pantalan sa Tagbilaran, kansang passenger terminal hingpit nga nahugno sa linog ug busa gipulihan una og mga tolda.

***

Pagpauli namo sa Sugbo, napahinumdoman ko sa laing nag-ngutngot nga suliran sa pantalan--ang kalisod sa mga pasahero pagpangita og kasakyan. May mga taxi nga niparada sa gawas sa passenger terminal. Apan way bisan usa sa mga pasahero nga niduol kay kahibawo nang daan nga lubagon sila. Sa ganghaan sa pantalan gisugat mi og mga laki nga dagko og tingog nga nagpahibawo nga may mga taxi nga di mag-metro o mopatong og labing menos P50 sa marka sa metro.

Bantang sa tanang tagduma sa pantalan ang raket apan way nakabadlong. Magbaktas og pila ka eskina ang mga pasahero ug morang gilawog sa mga elementong kriminal sa di pa makatsamba og taxi driver nga di mangilkil nila. Mao ni tinuod nga "world-class" nga pagpabaya.

***

Email: [email protected].