Kabahin sa pangalagad ni Jesu-Kristo

Ang mga tawo niduol ug naminaw kang Jesus kaniadto dili tungod lamang sa iyang pagpanudlo. Hinunoa, nahimong kabahin sa maong buluhaton sa pag-ebanghelyo mao ang paghimo og mga milagro nga dunay dakong kalambigitan sa kaayohan sa tawong nagmasakiton ug nanginahanglan. Sa matag higayon nga iyang ayuhon ang mga bakol ug mga buta (physical healing) naghatag siya og kahupayan. Sa matag higayon nga iyang ipaneguro ang kapasayloan ni bisan kinsang mga makasasala (inner healing) naghatag siya og kahupayan. Sa matag higayon nga iyang palayason ang yawa gikan sa giyawaan (Spiritual Healing) naghatag siya og kahupayan. Kini ang mga paagi diin nahimong mas konkreto ang mga pagtulon-an kalabot sa Paghari sa Dios. Ning maong paagi, gitataw sa atong Ginoo nga ang Kaayohan kabahin sa Diosnong laraw sa kaluwasan.

Kining maong buhat ang gisangon usab ni Jesus ngadto sa iyang mga tinun-an ug gani mismo sa simbahan nga mahimong kabahin sa pagpangalagad ang pag-ampo ug pag-atiman sa mga masakiton. Mao kini ang hinungdan kun nganong anaa ang Hilog alang sa mga Masakiton. Usa kini paagi aron ang mga magtutuo ang makasinati nga ang Dios mas personal nga nihikap kanila panahon sa ilang balatian.