Sala ba ang pagpangawat panahon sa kagutom?

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Mangtas si Yolanda. Gipanggun-ob niya ang mga balay sa taga Tacloban City. Gipamatay pa gyud niya ang daghang tawo. Tuburan sa tubig ug kuryente gikusokuso, giwatas-watas ug gipangguba sa makalilisang niyang hangin inubanan sa mga higanteng balud nga naglumbaanay sa pagkutlo sa mga kinabuhi, kinsa wala’y arang ikasukol batok sa iyang kinaiyanhong gahom. Ang nahabilin kinsa nagkuray sa katugnaw ug kahadlok, gipanggutom ug giuhaw intawon. Gisuroy-suroy nila ang nangahapla nilang pinuy-anan sa pamasin nga may pagkaon ug tubig silang madaginot nga ikaalam-alam sa nagkutoy na nilang tiyan. Apan bisan tipasi na lang, wala sila’y nakit-an. Asa? Asa sila’g bugas nga malung-ag? Asa sila’g tubig nga ilung-ag?

Nanglurat ang mga mata sa tibuok kalibotan pagkakita sa mga biktima ni Yolanda nga miransak sa Tacloban City Gaisano Mall. Nahisama sa bagang panon sa hulmigas ang gutom nga mga anino nga naglumbag pangsakmit-kuha sa bisan unsang butang nga ilang maalsa ug makawat.

Gikanibal ang tanang sulod sa Gaisano Mall. Gikan sa pagkaon, tubig ug sa mga mahalong butang nga dili makaon ug mainom sama sa mga refrigerator, TV set, freezer ug uban pa, gipanglabni’g gipangguyod sa gawas sa mga desperadong palad, kinsa wala na makaila unsay balaud sa yuta ug sa langit? Ang mall nahisama na lang intawon sa manok nga gihimulbolan sa mga piranha. Bukog na lamay nahabilin. Ug wala na mahitsura.

Sala ba ang gibuhat sa mga typhoon survivors, kinsa wala nay makaon ug mainom human ilampornas ni Yolanda? May miingon nga “dili” duna poy misulti nga “oo”. Mga opinyon ug hunahuna nagkatibulaag.

Apan alang sa kadaghanan, okay ra unta kadto kun ang gipangkuha sa mga typhoon victims o survivors, mga pagkaon lang ug tubig nga makatambal sa ilang kagutom ug kauhaw. Mosabot ra ang Kahitas-an niini. Apan ang pag-apil og alsa sa mga mahalong house appliances and furnitures nga dili na alang sa nagkutoy nga mga tiyan sa maong yugto, dako kaayo kining sala sa timbangan dinhi sa yuta ug didto sa langit. Dili na kini buhat sa mga inosenteng nanginahanglan. Kun dili, sa mga alistong sungayan!

Ning gihimo nila, aduna ba sila’y gugma sa ilang kaugalingon? Aduna ba sila’y gugma sa ilang isig ka tawo? Ug labaw sa tanan, aduna ba sila’y gugma sa atong Ginoo? Kay kun usa niining tulo, wala??? Aw, tataw na kaayo nga kita, tawo, nakasupak sa bililhong sugo sa atong Magbubuhat.