Pang-repack sa DSWD og foreign relief goods

Mo-uban ko sa panawagan ngadto sa mga gobyerno sa ubang nasud sama sa Norway, Amerika, Britanya, Australia ug uban pa sa pag-monitor sa ilang mga relief goods nga gipadala dinhi sa Pilipinas aron i-apod-apod ngadto sa Tacloban ug sa ubang lugar nga naigo sa bagyong Yolanda.

Misurok akong dugo nga nagbasa sa balita kalabot sa reklamo sa usa ka volunteer nga namutos sa mga relief goods nga gikan sa gawas sa nasud kay gi-repack sa mga sakop sa Department of Social Welfare and Development (DSWD) didto sa Mactan Airbase.

Ang nakakurat pa gyud kay bisan daghan na ang mireklamo kay misamot ang kalangay pagpadala sa mga foreign relief goods ngadto sa Leyte, nakuha pa gyud ni DSWD Secretary Dinky Soliman.

Pait kaayo kining gobyernoha. Human gipahibalo sa Malacañang pinaagi sa DSWD nga mopalusot sila og P70 milyones nga pundo alang sa relief goods, nang-repack sila og mga relief goods gikan sa gawas sa nasud aron ipatuo nga gikan sa DSWD.

Unsa kahay hunahunaon sa nasud nga tag-iya niining maong relief goods? Sa balita kagahapon, wala hinganli ang nasud, apan akong nasayran nga gikan kini sa Indonesia kang kansang mga hinabang gipaagi sa gobyerno.

Human nako mabasa ang balita, nabalaka ko unsay mahitabo sa bilyones dolyares nga kuwarta nga gi-donar sa Norway, Amerika, Britanya ug uban pang mga nasud aron ipabarog sa nahapla nga Tacloban ug uban pang mga lugar sa Kabisay-an.

Sa sinugdanan, akong gisinggit pinaagi sa Facebook nga mas maayong adunay “accounting” sa kuwarta nga idonar sa gawas sa nasud nganhi sa Pilipinas alang sa mga biktima sa bagyong Yolanda.

Sa among pakig-estorya sa usa ka higala nga taga-Europa, siya nagkanayon nga ang iyang nasud “aware” nga ang Pilipinas giharian og mga kurakot nga mga opisyal. Busa nagtuo siya nga kini maoy mangunay og superbisar sa paggasto sa ilang 65 milyones kroner.

Kun ingon na lang gyud niini ang atong nasud, nga bisan panahon sa katalagman mag-hari pa gihapon ang “patronage politics” sama sa nahitabo sa Tacloban ug korupsiyon sama sa pagpang-repack sa DSWD sa mga hinabang gawas sa nasud, akoy gikuyawan nga sa sunod kalamidad (simbako, labangon og pito ka lawod!) wala nay laing nasud nga motabang kanato.

Kanus-a man intawon ta makat-on!