Hala kakuyaw

Usa ka tawo nga nagpuyo sa balay sa akong silingan gipusil ug gipatay unahan sa Marco Polo Hotel kaniadtong Miyerkules sa gabii samtang nagpaabot kini sa iyang live-in partner nga nagtrabaho sa department store.

Matud pa nga naglingkud lang ang biktima samtang nag-text sa iyang cellphone. Sigun sa akong nahibaw-an nga nahanaw ang pitaka ug cellphone sa biktima mao nga posible mga tulisan ang mipatay. Pipila sa among mga silingan mitug-an kanako nga ang dapit diin patya si Alvin “Sadam” Cañete dunay mga drug pushers nga nag-operate. Nagduda sila nga natahapan si Sadam nga police informer ug mao nga gipatay.

Posible ‘sab. Kay usahay diay kuno, kadto si Sadam magsul-ob og jacket unya magkawo, dayon magsigi og text sa iyang cellphone. Dili imposible nga si Sadam nakatahapan nga tigpaniid sa illegal nga kalihukan sa mga pushers.

Misantup sa akong huna-huna nga kuyaw na g’yud diay karong panahona. Apan bisan og ibutang nato nga peligroso na karong panahona, dili usab ko uyon nga tugotan na lang ang mga tawo nga magdala’g armas.

Makahimo ang usa ka tawo nga magdala’g armas kun lisensyado ang iyang pusil ug aduna siya’y special permit nga nagtugot kaniya pagdala-dala sa iyang armas.

Tambag usab nako sa mga magdala og armas nga ayaw ninyo ipanghambog ang inyong mga pusil. Dili panghambog ang pagbaton og armas kun dili gitagana ra kini aron magamit pagpanalipod sa kaugalingon.

* * *

Kahilakon ko nagsud-ong sa dalaygon nga buhat sa usa ka tag-iya og tindahan nga tighimo og mga sinena diha sa Juliana Trade Center, ang karaang mall diha sa Magallanes. Ang Insikon babaye nga tag-iya sa maong “garment factory” uban sa iyang anak-dalaga maoy personal nga nanghatag og mga bag-o g’yud nga sinena sa mga biktima sa bagyong Yolanda nga bakwit gikan sa Tacloban ug anaa karon sa Tinago Sports Complex.

Saludo ko sa gihimo sa maong magpapatigayon. Hapsay usab kaayo ang iyang pagpanghatag og mga sinena tungod kay tagsa-tagsaon man niya ang paghatag og kadto ra’ng magustohan ug masul-ob g’yud maoy ihatag.

Dunay pipila ka kawani sa barangay nga mitanyag nga sila ra ang mohatag apan mihangyo ang tag-iya nga siya lang aron masiguro nga madawat gayud ang iyang hinabang. Pagkadalaygon sa iyang gihimo. Saludo ko Ma’am!

* * *

Grabeha ‘sab aning ubang tawo no? Dunay uban sa mga gipanghatag nga pagkaon aron ihinabang sa mga biktima sa bagyo didto sa amihanang Sugbo nga nangahanaw.

Mao kana ang rason nga bisan ako magduha-duha kun maayo pa ang paghatag. Kami hinuon sa The Freeman, matag usa kanamo gipangayoan og cash donation sa among opisina ug sila na ang mopalit.