EDITORYAL - Balik sa pagsugod sa sinugdan

Mao  kini  panaad  sa  mga  pamilyang nakasinati  sa kasakit  ug kahapdos  sa  latigo  nga  gibilin  sa  hangin  sa bagyong  Yolanda.

Di lamang  ang taga  Leyte, Samar, San Remegio,  Bantayan Islands  ug Daanbantayan  sa lalawigan  sa Sugbo ang  nakasinati  sa  hapos  sa maong  hangin  nga labing  kusog  sa tibuok  kalibotan.

Alang  kanila   mopukaw  sa  ilang  halawom  nga urom  ang  hulagway  sa nagbaguros   sa kasuko  nga  hangin  nga kutob  sa maagian mohapay  ug  di  na  makabarug  nga  gamhanan  sa yuta.

Busa  ang  kakuyaw  nga  di  nila  ikaasoy   ug  ikasugid  sa  dayag  apan  sa  ilawom  sa  ilang  galamhan   ila  kini  masud-ong  ilabi  na   sa panahon  nga   sila  mag-inusara.

Kadtong  nawad-an  sa mga  minahal  sa kinabuhi,  mga kabtangan  sama  sa   bay  nga  maoy  labing  mahinungdanon   sa pagpuyo  sa usa  ka  pamilya,  ug  uban  pa,  unsa  pa may pabilinan  sa usa ka  lugar  nga  maoy  naghatag  kanila sa  hilabihan  nga  kasakit.

Mobalik  sila  sa pagsugod  sa sinugdan,  bag-ong  panikaysikay  sa kapalaran,  hangtud  nga  mahibalik ang  normal  nilang  kahimtang  sa pagpuyo  ug  panginabuhi  nga  makapalimot sa nanglabay  nga  sungog  sa kapalaran.

Unsay  imong  buhaton,  mohangad  ka , motamod  ka  sa ilawom  wa kay  paglaum, molingi  ka pulos  kapakyasan  ug  sa laktud imo  ang  tanang  pag-antos  nga  way  kapasahan  sa imong  kaguol  busa pailubi  ang   pagbalik  sa  sinugdan.