Ang Dios uban kanato

Lisud ang kinabuhi kun buot hunahunaon tungod kay kini dili hingpit. Kuyog niini mao ang pagsabot sa pag-antos ingon nga krus nga dawaton na lamang sa tumang kamasinugtanon. Mura ba nga ang sakit ato dayong idugtong ingon nga kabubut-on sa Dios alang kanato aron kita mahigmata gikan sa atong masalaypong pagkinabuhi.

Maingon nga sabton nato tungod kay wala kita maigo sa grabeng katalagman, nagpasabot ba kini nga mas pinangga kita sa Dios kay kanila nga nabiktima sa hilabihan? Ang tubag dili. Ang sakit ingon man ang katalagman, kabahin lamang sa dili hingpit nga kalibutan.

Kini ang hinungdan kun nganong ang atong Ginoo nagpakatawo ug nipuyo uban kanato. Tabunok sa kahulogan ang paghulagway nga gihimo ni Gustavo Gutierrez sa iyang paghulagway sa Emmanuel nga mao ang: Pag-ugbok sa Ginoo og tolda uban sa katawhan. Kini ang nakapahimo sa Dios ingon nga mas personal ug suod alang kanato.

Atong mabasa sa mga ebanghelyo nga gawas sa pagpanudlo, nahimong kabahin usab sa pagpangalagad ni Jesu-Kristo mao man ang pag-ayo sa mga masakiton nga nakasinati og pisikal, emosyonal, espiritwal nga balatian.

Nag-unang tumong sa maong mga milagro mao man ang kalingkawasan sa mga biktima sa kaulipnan kuyog niini ang paghatag og kaluwasan sa biktima diha sa iyang lawasnon ug kalagnon nga aspeto. Sa laktod, anaa sa hunahuna sa Ginoo ang usa ka malangkubong kaayohan.