Estrikta nga maestro

Kaniadto nihit kaayo ang interesado o makatiwas o makagradwet sa kurso nga upat ka tuig sa pagka-magtutudlo. Ug kada tuig usab,nidaghan pud ang nang eskuyla sa atong pampublikong tunghaan sa elementrya. Tungod niini, nagkulang sa mga magtutudlo. Ang gibuhat sa departamento sa edukasyon, naghimo’g kuwalipikasyon nga makatudlo, pinaagi sa paghatag og sertipikasyon.

Dihang daghan na kaayo ang graduwado nga wa pa makatudlo, kadtong nagbaton la’g sertipikasyon nga wa gyud makagraduwet, gipanghulipan. Busa daghang magtutudlo nga mikambyon lag laing trabaho. Kini sama sa nahitabo, sa kanhing maestra, nga bisan sa iyang pagka-estrikta, mapagarbohon siyang niasoy sa iyang talagsaon nga kasinatian, nga kakuhaan nato’g pamalandong.

Sa usa ka tunghaang elementary ning dakbayan sa Sugbo, may usa ka maestro nga nabaniog kaayo sa iyang pagka-estrikta. Halos tanang ginikanan nga magpaenrol na sa ilang anak sa grade six, mohangyo gyud sa principal nga magpakiluoy nga kun mahimo dili lang maadto sa maong estrikta nga maestra. Apan kun brayt ang ilang anak…i-adto gyud ipahandol sa nahisgutang maestra.

Sa maong situwasyon, panahon sa klase, ang mga tinun-an bisan unsa ka sipat o kabadlongon, mokinto gyud kaniya. Sa tingog pa lang hadlokan na, busa wa gyuy magpatugatuga nga di buhaton ang tanan nga ipahimong homework o assignment, kay kundi malintikan gyud. May usa ka tinun-an niya nga hilom kaayong may kayugot sa maestro kay paminaw niya mora’g permi siyang giinitan.

Ang maong tinun-an karon, nahimong malampuson sa iyang career. Nga usa na ka milyonarya ug inila sa tibuok kalibutan sa iyang pagka-artista, ug tua na manimuyo sa abrod. Daghan siya’g mga kalihokang pangsosyal, buhat sa kaluoy, ug ubang gimbuhaton o proyekto nga pagpatukod og libreng pinuy-anan alang sa mga kabus. Wa siya malimot sa atong nasud nga iyang yutang natawhan.

Dihang nakaduaw sa Pilipinas, didto sa sikat nga mall nanuroy ug namalit. Unya wa tuyoa, may gikahimamat siyang tindera. Naila-ila niya ang kanhing maestro niyang estrikta. Gikuyawan ang iyang maestro tungod sa gibuhat niya kaniadto nga subra ra ka-estrikta kaniya. Gitutukan siya pag-ayo sa adunahan nang tinun-an niya..wa magdugay gigakos ang maestro ug nagpasalamat. Kay kuno kun di pa tungod niya di siya mahagit nga maabot ang iyang kalampusan.