Guadalupe: Senior Citizens Friendly!

Sa ato nang gihisgutan dinhi, aduna kunoy mga pundok sa senior citizens nga waa makapahimulos direktamente sa one percent nga pundo tungod lamang kay ang kapitan sa barangay waa makaayon sa nawong sa chapter president.

Lately adunay misugilon kanako nga tungod kay gidudahan ang ilang pundok nga kontra sa political affiliation sa kapitan (bisan tuod og apolitical unta mga barangay), ang kapitan mitukod gyud kuno og kaugalingong pundok.

Pagkadakung dimalas sa pikas nga pundok. Mabawo sila’g pangita kun asa sila magmiting, kay di na sila makagamit sa mitinganan sa barangay. Pastilan!

Lahi kami diri sa Guadalupe. Upat ka pundok sa mga senior citizens kami diri sa Guadalupe. Apan, ang tanan, nakapahimulos unsa man nga mga kaayohan ug mga privileges nga ihatag sa barangay. Lakip na sa one percent nga pundo.

Walay pagpinig ug walay gilabanan si Kapitan Michael Gacasan. Mao man gani tingali ang hinungdan nga nasublian siya tungod sa paghiusa sa mga senior citizens pagbotar kaniya.

Wala panumbalinga ni Kapitan Gacasan kun unsa man ang hilig sa politika sa mga senior citizens.

Gani, sa ato nang gihisgutan dinhi, iyang gigahinan og kaugalingong opisina ang mga senior citizens. Air conditioned pa. Gibutangan niya og lima ka lamesa, alang sa upat ka chapter presidents ug usa alang sa federation president.

Nganong di man ni mahimo sa ubang mga Kapitan? Isip amahan sa barangay, iyang mga anak ang tanang taga-barangay, labi na ang mga senior citizens, sa walay pagtan-aw kun ang ilang mga kasingkasing dapig ba sa BOPK o sa Team Rama.

Maoy atong panghinaut nga kun dili man gyud kalikayan ang pamolitika, kay magsakit man ang atong tiyan ug mahilantan man ta kon dili mamolitika, unta, Mr. Kapitan, spare the senior citizens.

Ayaw isipa nga walay labut sa inyong barangay ang mga senior citizens nga ang loyalty atua sa inyong kaatbang sa politika. Mao ni ang hustong pagpangagamhanan. Layo pa bitaw ang 2016. Mag-usa ug mag-friends lang una kita karon.

Ang inyong kadaugan sa miaging eleksyon, ayaw gamita nga inyong kasangkapan pagpanimalos. Mag-unite ug mag-friends lang una kita karon. 

In the meantime, paminaw sa Senior Citizens Hour sa DYRC, 648 kHz matag Sabado, 5:00-6:00 pm. Tels. 4125829, 4125898.