Pangandam alang ni Yolanda

Human sa linog sa nakalabay’ng bulan, aniay dakong bagyo ang mokusokuso sa Kabisayaan sugod karong adlawa. Si Yolanda giingon nga usa ka super typhoon ug labing kusog nga bagyo nga mohapak sa nasud karong tuiga.

Karong adlawa gikataho nga mo-land fall si Yolanda sa Samar ug Leyte. Sa kakusog niini, modeklara kuno ang PAGASA og signal number 4 alang niadtong mga lugar nga maigo niining bagyo.

Ug dinhi sa lalawigan sa Sugbo, adunay mga preparasyon alang sa maong bagyo. Plansado na ang tanan mahitungod sa lapad nga rescue ug relief operations sa kagamhanan sa probinsiya.

Bisan dinhi sa dakbayan sa Sugbo andam na ang tanan alang sa paghapak ni Yolanda.  Ang kagamhanan sa dakbayan aduna nay mga measures alang sa dali nga operasyon ngadto sa mga lugar nga adunay dakong kadaot.

Apan bisan pa sa mga panawagan alang sa kalma nga pagpangandam, adunay pipila nga halos nataranta sa ilang preparasyon. Adunay mga taho nga mora na og nag-panic buying sa mga department store.

Taas kuno ang linya didto sa mga grocery stores sa mga tawo nga binulto ang gikumpra isip preparasyon sa bagyo. Halinon kuno ang mga flashlights, noodles ug canned goods.

Mao gyud kini ang eksena panahon sa kalamidad. Apan hinaut nga dili mosangpot sa panic buying kining maong sitwasyon. Daghan na kita’g nadunggan nga mga trahedya nga resulta sa natarantar og pamalit.

Hinaut nga dili dako ang kadaut nga masinati sa Sugbo. Hinaut nga walay grabeng perwesyo ang hatud niining dakong bagyo. Ug atong i-ampo nga mas mohinay si Yolanda sa pagtadlas niini sa Kabisayaan karon.

Hinuon anad na kitang mga Pilipino nga mosagubang sa unsa mang mga katalagman nga mohapak kanato. Agianan kita og mga nagkalain-laing trahedya apan lig-on gihapon kitang mosagubang ning tanan. Dinhi sa Cebu nakatagamtan ang mga Sugboanon sa kabangis ni Ruping duha ka dekada na ang nakalabay. Apan maisugon sila nga mibangon taliwala sa mga nagusbat nga mga kabtangan.  

Ug si Yolanda usa lamang sa mga pagsulay nga kayang sagubangon sa mga Sugboanon. Angay lamang nga magmakalmahon kita aron nga walay dakong kadaut ang atong mahiaguman.