Budget hearing na g’yud

Magsugod na karong Lunes sunod semana ang sunod-sunod nga budget hearing diin tukion sa mga sakop sa Cebu City Council ang gisugyot ni Mayor Michael Rama nga P10.4 Billion nga Annual Budget 2014. Ang budget hearing himoon kada adlaw, walay labut sa Miyerkules nga sesyon sa Konseho, ug sa mga adlaw’ng Sabado ug Domingo. Molungtad ang budget hearing unya pa sa Nobiyembre 29.

Ang unang tukion sa mga konsehal, ilabi na sa mga sakop sa Budget and Finance Committee nga gipangulohan ni Konsehal Margarita “Margot” Osmeña mao ang “sources of funds.”

Tan-awon sa mga konsehal kun asa og kwarta ang executive department aron mapundohan ang daku kaayo nga kantidad nga gisugyot sa mga sakop sa Local Finance Committee.

Ang tinuod, basi sa balaud, ang Local Finance Committee nga naglangkob sa city treasurer, budget officer ug ang planning and development officer, mao g’yud ang misugyot sa P10.4 Billion nga annual budget.

Ang mayor igo lang nga mipirma ug miaprobar sa gisugyot nga budget. Kana basi sa dukomento ug basi sa balaud. Walay problema ang pagsugyot og daku nga budget kay basi sa balaud, ang Annual Budget ibasi lang sa bana-bana nga koleksyon sa buhis ug ubang revenues sa usa ka local government unit.

Lahi kini sa supplemental budget nga kinahanglang suportahan gayud og actual nga kuwarta.

* * *

Ang Local Finance Committee misugyot og P6.7 Billion nga budget para sa dakbayan sa Sugbo karong tuiga 2013, apan P5.1 Bilyones lang ang giaprobahan sa konseho.

Basi sa akong nahibaw-an nga pagka karon kapin pa lang sa P4 Bilyones ang nakolekta sa dakbayan gikan sa buhis, Internal Revenue Allotment (IRA) ug sa bayad gikan sa SM Prime Holdings Inc.

Sigurado ko nga dili makolekta sa mga tax collectors sa dakbayan ang kinatibuk-ang budget nga P5.1 Bilyones. Kini maoy akong gibasihan nga dili na usab aprobahan sa konseho ang kinatibuk-ang budget nga gisugyot sa Local Finance Committee ug giaprobahan ni Mayor Rama.

* * *

Apan unsay epekto kun dili aprobahan ang kinatibuk-ang sugyot sa LFC? Sa akong tan-aw wala g’yud. Gusto lang tingali sa mga konsehal nga dili mabawo ang katawhan nga magsalig nga duna sila’y proyekto apan dili diay mapatuman kay dili man makolekta ang kinatibuk-ang budget.

Sa ako na nga gibalik-balik sa pag-ingon nga wala g’yuy problema ang paghimo’g daghang proyekto kay mahimo man kini nga mahimoan og supplemental budget kun duna na’y subra nga koleksyon. Apan unsaon nga ang atong mga tax collectors luya kaayo sa ilang trabaho bisan og daghan unta kaayo og buhisanan dinhi sa dakbayan.