Walay kapuslanan

Kining isyu nga akong hisgutan karon, sagad matuki lang panahon sa All Saint’s ug All Soul’s Days. Kabahin kini sa pagkuwang sa pangalagad sa nagdumala sa sam-ang diha sa Caretta, kaniadto ug karon.

Ang sepulturero kon “cemetery caretaker” gibutang kini aron magsilbi unta nga manager sa sam-ang. Siya ang motan-aw unya mohimo’g mga maayo’ng kausaban diha sa gidumala niya nga sam-ang. Apan tan-awa ra gud ang sam-ang diha sa Caretta. Makita nimo nga aduna gihapo’y mga hakog og lugar. Dunay mga bentahoso ug ingon man mapahimuslanon sa higayon.

Nasayud ko nga ang Cebu Metropolitan Cathedral Cemetery kining naila nga sam-ang sa Caretta gidumala man sa kaparian diha sa Cathedral, tan-awa ninyo ug ang caretaker nga inyong gibutang mitrabaho ba.

Natan-aw nako nga maayo lang kamo nga mokumkom sa kwarta gikan sa bayad sa kabanayan sa gipanglubong diha, wala gayud mo’y pagpalambo nga gihimo.

Sa laktud, hugaw kaayo ang menteryo. Nganong dili man ninyo pasilhigan kanunay ang mga dapit diha sa menteryo? Unya nganong gitugot man ninyo kanang mga “illegal construction” diha?

Tan-awa ra gud kanang usa ka linya sa mga “bone chamber” butangan sa mga bukog nga gidugang sa han-ay sa San Tadeo, klaro kaayo nga gidugang ra kana pagpuno, tingali aron makakwarta ang tawo nga mapahimuslanon.

Unya, kanang mga gisemento nga anaa sa atubangan sa mga nitso nga mora’g masabut nga ilaha na ang maong dapit, dili kana maayo kay makasabal kana sa pag-agi sa mga tawo. Daghan kaayo kana diha sa menteryo sa Caretta.

Unsa, wala mo kakita ana Mr. cemetery caretaker? O kaha wala masulod sa imong huna-huna kun unsa’y implikasyon sa pagbutang nianang maong mga gisemento nga atubangan sa mga lubong?

Kamo ‘sab nga mga pari diha sa Cathedral, pangita ‘sab tawon mo’g paagi nga mapalambo ninyo ang menteryo nga inyong gidumala. Nalupig na lang hinoon kamo sa kaparian sa Sto. Rosario nga maoy nagdumala sa menteryo sa pikas.

Kining akong lindog karon, sakit-sakit kini apan ako kining gitumong aron mahimong hagit nga inyong gamiton ang inyong utok sa paghuna-huna, dili kay sigi lang ta’g dawat sa sweldo isip caretaker sa menteryo, ug ang mga pari sigi lang ‘sab dawat sa bayad sa mga maglubong diha sa Caretta cemetery.

Samtang nagtan-aw ko sa palibut sa menteryo sa Caretta, nakaingon ko sa akong kaugalingon nga kun ako pa ang caretaker sa sam-ang, mohimo ko’g hugot nga rekomendasyon sa kaparian nga mosweldo og tiglimpyo sa menteryo.

Unya, kanang mga nanginabuhi diha sa menteryo angay sila nga moabag sa pagpanglimpyo, kay sila ‘sab nag-apil-apil sa paghugaw-hugaw, dili ba gud tinuod?