Kahayag human sa kangitngit

Matag tawo adunay tinguha nga motugkad sa bisan unsang misteryoso. Ang mga ritwal mahinungdanon kaayo aron mahatagan og mas konkretong pagpasabot ang mga butang dunay kalambigitan sa kalibutang espirituhanon. Mao nga anaa ning mga panahona ang mga halad/harang panahon sa kalag-kalag ngadto sa mga nitso sa nagkadaiyang sam-ang sa atong kapupud-an.

Apan subo lang palandungon nga ang nahimong sentro sa mga kalihukan mao na man ang mga maligno, mga kahadlokang mga sugilanon, mga elementals ug uban ang pagsabot nga menteryo kun sam-ang dapit nga sagrado ug dili dapit sa patuo-tuo.

Daghang mga tawo ang wala pa gihapon makalabang sa kinaiya ug pagsabot nga nasambugan sa mga mentalidad sa pagano ug aminismo. Wala nila makita nga gawas sa Halloween adunay mas makahuloganon pa niini nga mao ang kahayag ug kinabuhing dayon nga gitagana sa Dios alang kanato.

Sa laktod ang Nobiyembre Uno ug Dos nagpahinumdom kanato sa kamabulokon sa kinabuhing Balaanon. Ang Nobiyembre Uno nagpahinumdom nga kitang tanan gitawag aron mahimong mga santos ug ang Nobiyembre Dos nagpahinumdom kanato nga ang kamatayon ganghaan lamang alang sa kinabuhing dayon.

Hinumdoman unta nato labi na gyud sa mga kuryoso nga dili cute ang mga maligno ingon man ang mga demonyo nga tungod niini sila giidolo pag-ayo.

Mapintason sila ug matampalason busa ayaw ninyo suwayi ang bisan unsang occult games nga makadaut sama pananglit sa Spirit of the Glass, Bloody Mary ug uban pa. Mahimong inyong gibuhat duwa-duwa lamang apan ang maong mga duwa mamahimong agianan sa dili tiaw nga kadautan.