EDITORYAL - Ang kamahinungdanon sa insurance

Kun tinuod  nga wa ma-insured ang  Cebu City Hospital ug  ang ubang mga  dagkong building  sa gobiyerno  nga  nangliki  ug  ayuhonon, pagka-dimalas  sa siyudad.

Kay ngano  ba  taliwa  sa  ka-moderno  sa panahon, daghan lang  gihapon  ang  wa masayud  sa kamahinungdanon  sa insurance  sa  panahon  sa katalagman  ug  di  katalagman?.

Ang  gobiyerno  usahay  magsalig  nga  daghan  kini  og  kuwarta  hinungdan  nga  dali ra kaayo  makagahin  og  salapi  alang  sa unsa  mang  infrastraktura  nga  ipatukod  niini.

Apan  sama karon  nga  bangkaruta  ang  siyudad,  unsa  may  ipatukod  niini  og  hospital diha-diha.

Apan  kun  napa-insured  pa  ang  maong  building, nahikay  na unta  tingale  ang  mga  papeles  niini  aron  mabayran kini  sa  kompaniya  sa insurance.

Gani  daghan  kaayong mga  life ug non-life  insurance  company  nga  nagkatawa  sa nahitabo ilabi  na  sa lalawigan  sa Bohol  nga  mga  karaang  simbahan  ug  mga  pribado  ug  iya  sa  gobernong  edipisyo  nga  nangalusno.

Kini tungod  kay  way  nangita  kanila  kaniadto  sa maayo  pa  ang  panahon.

Aw  hinuon  kun nakapa-insured  pa  usab  ang mga  tag-iya  sa maong  mga  balay  ug  edipisyo, daghan  tingale  usab  nga  kompaniya  sa pasiguro  nga  mabangkarota .

Apan  tungod  kay  way  nakasiguro  sa kahimtang  ug  lakaw  sa panahon, nganong  di man nato  ulitawhan  ang  atong  kaugalingon  aron mosugot  kini  nga atong  ibutang sa siguro  ang  atong  mga  butang.