Daghan kaayong salamat

Tugoti nga sa pagbalik ning akong lindog maoy akong unahon ang akong dakong pagpasalamat sa akong mga kaigsoonan sa Barangay Quiot kay bisan tuod og wala ako sa kinatibuk-ang skedyol sa pagpangampanya sa milabay nga piniliay sa barangay ila gihapon akong gibutang sa ika unom nga luna sa konseho.

Labi upod nakong pasalamatan ang mga coordinator ug mga sakop sa Tabang Alang sa Maayong Alagad (TAMA) nga tudo ang suporta sa akong kandidatora, ang grupo ni nang Perla Aniana nga wala ugod mobiya kanako sukad pa kaniadtong tuig 2010, mga sakop sa AKRHO sa Barangay Quiot, mga silingan ug mga kahigalaan, kaninyong tanan daghan kaayong salamat.

* **

Wala pa gihapon mahuman ang kalanrakas. Human sa piniliay sa barangay mao na usay mosunod ang adlaw sa mga patay ug mga santos dayon ang Pasko. Seguro makaingon kamo nga walay angayang isaulog sa Pasko tungod kay daghan sa atong mga kaigsoonan sa Bohol, Sugbo ug pipila sa Siquijor ang namatay tungod sa kusog nga linog nga miigo ning mga lugara kaniadtong Oktubre 15, 2013. Pero sa akong kabahin angayan ra gihapon kitang maglipay tungod gihatagan pa ta og laing kahigayonan nga mabuhi tungod kay aduna pa seguroy laraw kanato ang Ginoo dinhi sa kalibotan.

Sa ako lang kabahin didto ko sa ikapito nga andana sa JV Tower dihang naglinog ug grabe kaayo kakusog sa akong nahimutangan ang linog. Tungod sa ka kusog sa tay-og nagtoo kong mao na to ang akong kataposan pero nia buhi pa ug nakig-storya kaninyo busa angayan tang maglipay niini kay gihatagan tag lain pang lugway sa kinabuhi.

Giisip nakong bag-ong kinabuhi ang akong kaluwasan sa linog busa dili nako kini sayangon ug akong ipaniguro nga dili magmahay ang Ginoo sa iyang paghatag pa kanako og dugang kinabuhi.