Tumanon g’yud ang balaud

Husto baya ang sugyot ni Konsehal Margarita “Margot” Osmeña nga angay’ng ibalhin na ni Mayor Michael Rama ang tanang wala magamit nga Calamity Budget ngadto sa Account alang sa Local Disaster Risk-Reduction Management Fund (LDRRMF).

Gusto lang ni Konsehal Margot nga masiguro nga ang wala magamit nga Calamity Budget dili gamiton ni Mayor Rama sa lahi nga katuyoan. Para nako husto baya kay mao man kini ang gilatid sa balaud. Nanumpa gud si Mayor Rama nga motuman siya sa tanang balaud dinhi sa Pilipinas. Kini maoy rason nga dili angay nga mag-ukon-ukon ang mayor sa pagtuman sa lagda nga gilatid sa Republic Act 10121.

Matud ni Konsehal Margot nga nasayran niya nga adunay P103 Milyones nga wala magasto gikan sa Calamity Budget kaniadtong 2012 mao nga kinahanglan kini nga ideposito sa LDRRMF.

Angay gayud nga tumanon ang maong balaud. Gikuyawan ko nga basin og gamiton na usab kini sa mayor sa paghatag og dugang honoraryom ngadto sa mga opisyal sa kabarangayan.

Wala g’yud ko makauyon sa gihimo ni Mayor Rama nga giilog-ilog niya’g hatag ang honoraryom sa mga opisyal sa kabarangayan dinhi sa dakbayan dihang nagsingabot pa ang eleksyon sa barangay.

Masabot man gud nga kabahin kini sa pamolitika kay kaniadtong nagsingabot ‘sab ang eleksyon sa miaging Mayo, gipa-release usab sa mayor ang bali’g tulo ka buwan nga dugang honoraryom sa mga opisyal sa barangay.

Dantan og pipila ka buwan, gipa-release na usab niya ang bali’g unom ka buwan nga dugang honoraryom sa mga opisyal sa barangay ug kini gihimo na usab sa nagsingabot ang eleksyon sa barangay.

Miingon ko nga wala ako makagusto kay samtang giilog-ilog niya paghatag ang dugang honoraryom sa mga opisyal sa barangay, nakalimtan sa mayor ang pagtuman sa iyang saad nga ang mga scholars sa dakbayan pahatagan niya’g tagsa ka libo ka pesos nga school supply allowance matag semester.

Ngano gud nga ilog-ilogon man ang paghatag sa honoraryom sa mga opisyal sa barangay nga duna man sila’y sweldo sa ilang barangay.

Duna ko’y higala sa City Hall nga akong giprangkahan nga wala ko makauyon sa ilang gihimo nahiubos ug nasuko. Dili na gud motingog. Pastilan, sali’g lang mo kay nindot man kaayo mo’g benepisyo. Atimana ‘sab tawon ang gisaad ninyo sa mga tinun-an uy. Hapit na tulo ka tuig nga wala na mohatag ang City Hall sa school supply allowance sa mga scholars.

Ang pangutana mao kini. Nganong dili man gayud ibutang sa account sa LDRRMF ang wala magamit nga Calamity Budget?