Garbo babag sa tabang

Ambot kinsay una namo sa Philippine Red Cross nga nakapada og hinabang sa Maribojoc, usa sa labing naggusbat sa linog sa Bohol. Sa unang mga adlaw sa Kapamilya Relief Campaign, kanus-a gihingusgan namo og pada og linuto nang mga pagkaon sama sa puso, linung-ag nga itlog ug pan tungod sa kabalaka ni Bohol Governor Edgar Chatto nga wa pay suplay sa kuryente ug tubig ang kasagaran sa mga lungsod ug busa mahimong di pa makaluto sa ilang kaugalingong pagkaon ang mga biktima, gikuha ni Maribojoc Mayor Leoncio Evasco Jr. ang akong dang hinabang.

Wa ko mosupak. Gitugyan nakong Evasco ang mga hinabang. Bugtong nakong hangyo nga iuna paghatag sa di pa madaot.

* * *

Nahatod nakong mga hinabang sa Maribojoc kay gipaangkas ra ko ni Austrian Consul Julie Alegrado-Vergara sa ilang bangka sa Maribago Bluewater Beach Resort nga nagda og daghang tubig mainom ngadto sa gipang-uhaw pang mga biktima sa linog sa Maribojoc, Loon ug ubang mga lungsod nga nabuwag sa ubang bahin sa Bohol tungod sa nangaputol nga kadalanan ug mga taytayan.

Ang wa nako pagsukol ni Evasco di tungod sa prinsipyo. Kun di tungod sa kakuwang sa panahon. Naikog kong Consul Alegrado ug sa mga tripulante sa iyang bangka. Nihangyo ming magpada sa evacuation centers apan didto mi nila dad-a ni Evasco. Bisan sa among pagdali lawom nang gabii ming nabalik sa Sugbo.

* * *

Mahitungod sa away ni Evasco ug sa PRC, di kong kasabot nganong nagdumili si Evasco paghatag og listahan sa mga biktima sa linog ngadto sa PRC. Kinsa sama sa ubang kahugpongan nga gustong motunol og hinabang ngadto sa tanang biktima kinahanglan gyong magpakisayod pila ka buok ang tabanganan aron nga makaandam sa tukmang gidaghanon sa mga hinabang.

Mahimo baya unta nga mohatag si Evasco og listahan sa PRC apan moawhag lang nga i-apud-apod ang mga hinabang ubos sa iyang sistema. Kana kun tinuod nga giumol niyang sistema aron pagsegurong mahatagan ang tanang biktima.

* * *

Labaw kong maglisod pagsabot sa pagdumili sa PRC pagtunol og hinabang sa Maribojoc tungod lang sa ilang panagsungi ni Evasco. Unsa man diay ang ilang pagtabang-ihatag lang kun mo-amen ang mayor sa ilang kagustohan?

Nakadayeg ko sa lokal nga mga opisyal sa PRC. Apan sila’y labing unang moangkon nga di hinimo sa langit ang ilang lagda. Timaan sa kaarogante sa nasudnong liderato sa PRC ang awhag sa ilang tsirman nga si Dick Gordon nga mandoan sa Comelec ang nasudnong gobyerno pagtugyan sa tanang hinabang sa PRC aron sila nay moapud-apod. Nidason ni sa reklamo sa pipila ka biktima sa bagyong Sendong sa amihanang Mindanao nga gipahuwat sila og pila ka oras kay wa ipanghatag ang andam na untang mga hinabang hangtod nga niabot si Gordon.

* * *

Email: [email protected]