Mga tipik sa talan-awon sa nahitabong linog

Hinayhinay na nga nahupay ang kahadlok sa katawhan sa 7.2 magnitude nga linog niadtong Oktobre 15 niining tuiga nga gisundan sa daghan pa nga mga pagtay-og nga mga aftershock ug gitiwasan pa sa pagpakatap og mensahe sa mga  tawo nga wala’y lingaw nga nagpahibalo nga laing linog nga mahitabo sa gikusgon nga 8.2 magnitude nga nahimong tinuod apan didto  mahitabo sa nasud sa Japan.

Bisan kun hapit na molungtad ang duha ka semana nga nakalabay sa maong talan-awon nga nahitabo sa Sugbo ug Bohol apan hangtod karon sa panagtagbo sa managhigala o managsilingan  ang linog llang gihapon ang ilang pagahisgotan.

Adunay moingon nga napugwat kini sa iyang paghinanok og katulog sa kusog kaayong pagtay-og sa iyang gihigdaan sa sulod sa ilang lawak sa panimalay nga sa sinugdanan maoy pagtuo nga igo lamang kining gidaman.

Dihang nabati na ang pagsininggitay sa mga silingan nga nagkayaon nga linog  wala kini maglangan sa pagdagan ug nakalimot na lamang sa pagsul-ob sa iyang sapot sa pagsiguro sa iyang kaugalingon.

Ang naligo sa sulod sa banyo wala makahuman ug dali kaayong nakakab-ot sa tualya nga maoy gitapis sa hubo niining kalawasan ug  ang pipila nga nagtuman sa sugo sa lawas wala makahuman sanglit mikaratil man kini sa pagdagan.

Adunay nagkaon nga wala pa gani makapunit alang sa unang hungit dihang kalit lang ang kusog nga pagtay-og  wala kini maglangan sa pagdagan ug pagkaon sa talad-an nahurot og katikwang.

Adunay wala makapugong sa paghilak ug nakasinggit sa kahadlok sa pagtuo nga mao na kadtong higayona ang katapusan sa kalibutan ug dihang nahuman ang linog hilabihan nga nakaampo ug nagluhod sa pagpasalamat nga nahunong na ang kusog nga pagtay-og.