Piyesta human sa linog

Antequera, Bohol--Piyesta na dinhi karong Sabado. Tungod sa kalapad sa kadaot nga gibilin sa makalilisang nga linog ug tungod sa nagpadayon nga kusog nga mga pagtay-og, ang umaabot nga kapiyestahan di maoy naa sa hunahuna sa kasagaran sa mga molupyo. Hapit tanan nila di nang kabalik sa ilang mga pinuy-anan, nidangop sa evacuation centers o nagtolda gawas sa ilang kabalayan.

Mas naghamok karon sa mga molupyo ang kahingawa asa gikan ang sunod nilang makaon, hangtod kanus-a nga makalahutay ang panglawas sa ilang mga hamtong ug kabataan, kanus-a mohunong ang aftershocks, kanus-a matukod pagbalik ang ilang mga pinuy-anan ug kanus-a sila makasugod pag-usab.

* * *

Mga hamtong nga mga molupyo nangaliya nga makasabot ang ilang patron, ang Birhen sa Sto. Rosario, sa kakuwang nila og pangandam alang sa iyang kapiyestahan. Nanghinaot sila nga di gabaan sa ilang kapakyas pagtabang paghipos sa mga tipaka sa naggusbat nga kampanaryo ug sa luyong bahin sa simbahan. May mga higayon nga nataligam-an nila ang pagtambong sa mga misa nga gihimo sa covered court.

Giuna nila pagsusi kanus-a ang sunod nga pagpanghatag sa mga hinabang nga pagkaon ug tubig gikan sa munisipyo ug sa pribadong kahugpongan ug kun may mga hinabang na bang kaluwatan sa pagsugod sa ilang panginabuhi ug pagtukod pagbalik sa ilang mga pinuy-anan.

* * *

May mga molupyo hinuon nga nitataw nga ang niaging linog di babag sa ilang pagsaulog sa piyesta karong Sabado. Bisan sa lapad nga kadaot sa ilang palibot nakakita gihapon og abundang sukaranan sa pagpasalamat sa Birhen sa Sto. Rosario nga giluwas sila gikan sa katalagman ug gigasahan og laing kahigayonan sa pagpuyo sa balaanong gasa sa kinabuhi.

Naneguro silang magpadayon ang naandan nga relihiyusong pagsaulog apan mamenosan na ang naandan nilang mga kumbira. Ang hiniposang kuwarta alang sa piyesta gitagana na nila pagpaayo sa ilang kabalayan. Maong nangayo nang daan og pasaylo sa naandan nilang mga bisita sa piyesta.

* * *

Sa iyang bahin, si Mayor Boy Pahang niingon nga ang niaging linog mosangpot sa dagkong kausaban dinhi. Apil nang naggusbat nilang simbahan ug munisipyo ug namat-an nila og buot nga katahom sa Mag-aso Falls tungod sa pagkabuak sa dakong bato nga giawasan sa sapa sa ibabaw ug sa paghiyos sa gihagsaang linaw tungod sa pagdahili sa yuta.

Apan masaligon siya nga magpabilin ang ilang naandan nga kakugi ug kamalaumon ug kamasaligon sa mas malambuong ugma. Matod niya karong inanay nang nahibalik ang suplay sa kuryente, isunod ang pag-ayo sa sistema sa ilang suplay sa tubig ug pagsumpay pagbalik sa naputol nga kadalanan ug mga taytayan. Nanghinaot siyang katabangan sa nasudnong gobyerno ang pag-ayo sa naggusbat nga kabalayan aron inanay nang makabalik ang mga molupyo sa inadlaw-adlaw nilang mga panginabuhi.

* * *

E-mail: [email protected]