Mga kisaw sa barangay election

Nagsugod na sa ilang pagpangampanya ang mga kandidato alang sa Oktubre 28, 2013 nga barangay election niadtong tungang gabii niadtong petsa 18 ug matapos sa tungang gabii sa 26 sa maong bulan niining tuiga.

Kun ang nangaging mga adlaw nga maoy namatikdan ang makapahingangha ang gipakitang kalit nga kausaban sa kinaiya sa imong silingan nga nahimong matinagdanon ug mapahiyomon  karon na ang tukmang panahon  sa gipangita mong tubag  sa mga pangutana nga gitipigan sa imong kaisipan.

Ang tubag mao nga kandidato diay sila sa umaabot nga barangay election nga maoy hinungdan nga nahimo silang mapahiyomon ug matinagdanon kay usa man diay sila sa mga magpapili sa barangay election.

Gipakita nila sa ilang mga hulagway nga mapahiyomon ngadto sa katawhan sa pagkabig og suporta sa ilang kandidatura nga gisalimbongan lamang sa ilang pagpakaaron ingnon kay human sa piniliay mapilde man o modaug sa gihapon mobalik man kini sa naandan nga magkusmod lang ang mga nawong.

Ang buhatan sa Commission on Election (Comelec) hugot nga nagpahimangno ngadto sa mga incumbent official sa pagpadaplin sa maong piniliay kay non partisan man ang maong piniliay.

Ang buhatan sa Department of Environment and Natural  Resources (DENR) 7 hugtanon nga nagpahimangno sa tanan nga mga  kandidato nga likayan ang paglansang o pagbitay sa ilang campaign materials ngadto  sa kahoy kay makahatag man kini og kadaut ug hayan pa gani nga kini ang hinungdan nga mamatay ang kahoy.

Si Dr. Isabelo Montejo nga maoy director sa DENR 7 miingon nga ang  linansangan sa kahoy nga maoy gibutangan sa ilang mga campaign materials maoy makaingon sa pagkamugna og kadaut kay magabok man ang punoan   sa higayon nga makasulod na ang dangan nga magsugod na sa pagkutkot.