Pasalamat

Atong namatikdan nga ang tanang matang sa katalagman nanghitabo na karon sa nagkalainlaing dapit sa kalibutan. Forest fires, tornado, storms, floods, landslides, earthquakes, tsunami, wars, etc., etc., etc.

Sa mga prophets of doom, warning na kono kini. Back to God, tambag nila. All of a sudden, nahimo silang mga tigpamaba sa Ginoo. Of course, gikinahanglan ang pag-ampo. Apan, di kinahanglan ang subrang pag-panic, hangtud hinoon nga waa na kita’y mahimo, gawas sa paghuwat sa mosunod nga mga aftershocks.

Samtang atong gikasubo ang nahitabo sa lalawigan sa Bohol nga naigo pag-ayo sa linog, nagpasalamat kita sa mga Sugbuanon nga dali nga misanong sa nagkalainlaing pundok (government and the private sectors) pagtunol sa tabang ngadto sa Bohol, bisan tuod og natay-og usab kita dinhi sa Sugbo.

Atong nakita nga milihok gayud ang Sugbo. Kanilang tanan, miduyog kita pagpasalamat kanilang tanan.

Adunay mga pangutana: Ngano nga giatol man gyud nga holiday? Atong ma-imagine kun unsa unta ka grabe kun regular working day pa. Unya, imagine usab kun gabii pa ang linog.

Aduna usay mga pangutana, nga sa mga simbahan nga nahugno, ngano nga walay usa ka tawo nga nadat-ugan. Dinhi sa ato, pananglitan, pagkahugno sa kampanaryo sa Sto. Niño, wala gayu’y nadat-ogan.

Unya, tapus sa linog, ang mga pasyente sa mga hospital, gipagawas, ingonman pipila ka pamilya diha na sa dakung hawan magpuyo. Ug niining mga adlawa, taliwaa sa hulga sa laing bagyo, wala nato masinati ang pagbunok sa ulan. Niining tanan, ang Kahitas-an da ang makatubag ini.

Diha say nangutana, kun kadtong nakadawat og minilyon nga bonus, sama sa taga-SSS,  di ba kono sila makagahin og pila ka pesos alang sa mga nabiktima sa linog, nga kasagaran ini, mga sakop sa SSS?

Taliwaa sa mga katalagman nga bag-ong mihapak sa atong dapit, ug taliwaa sa kagutom nga gibati karon sa tibuok nasud, waa ba kaha matok-i ang taga-SSS paghungit nila sa pagkaon gikan sa bonus nga ilang gi-reward sa ilang kaugalingon?

Unya, kadtong mga gikawat nga pork barrel, waa man ta kadungog nga ila kining igahin ngadto sa mga nabiktima sa linog. Mahimo man unta to nga mag-anonymous lang sila. Ug dili kinahanglan nga ilang ibutyag nga gikan sa kinawat nilang pork barrel ang ilang donation.Ug sila ra ug ang Ginoo mahibawo sa tanan. Duna pay purohan nga mapasaylo pa sila sa Ginoo.

Sa mga kasayoran nga atong nadunggan, mas kusog, mas dali ug mas daghan ang mga relief goods nga midangat ngadto sa Bohol. Unsaon, daghang kuskos balungos ang gobiyerno. Dili makalihok dayon.

Lahi sa nahitabo pag-Ruping sa Sugbo, diin dali kitang nakabangon, gumikan sa paglihok dayon sa local government, inabagan sa private sector. Everything was under control ni Gov. Lito Osmeña. Kahinumdom mo?