EDITORYAL - Dagha’g leksyon ang linog nga 7.2

Managsama ang nasinatian sa matag  usa, mabata ug matiguwang sa 7.2 nga gikusgon  sa linog  niadtong  Martes.

Usa lang ang  gibati  sa matag  usa  nga  nakasaksi unsa  kakusog  ug  kadugay  ang  maong  tay-og.

Gumikan  sa kakalit, wa na makahunahuna  og  ampo  ang  kadaghanan tungod  kay  ang  diha  sa ilang  galamhan  mao  ang  kakulba  ug  kakuyaw unsay  sunod  nga  mahitabo.

Sa mga  nakasaksi  nga  natumpagan  sa ilang  balay,  o  mga  dagkong  butang  sa usa ka pamilok, kinsa  bay makasampit  og Dios.

Ang uban nakabsan  og  kinabuhi, samtang  ang  uban naangol ug anaa  pa  sa tambalanan.

Daghang  mga  hunahuna  ang  miabot  sa galamhan  sa mga  buhi  nga  nakasinati  sa kasakit  ug kahapdos  sa  agi  sa linog.

Ang uban  nga  wa masakiti,  ang  kakulba  ug  kakuyaw  maoy  mihakop  sa ilang  kaugalingon sa maong higayon.

Busa ang  uban  miingon  nga  nangita  sila  og  Dios  nga  magbubuhat ug di  kay  ang  binuhat.

Ang uban  miingon  nga  padayon  sila  sa pagsalig  sa ilang  Dios  nga  kinulit.

Ang uban nagplano  nga  kun magpatukod  og  building, kana  gyung  labing  lig-on  nga  di  matarug  sa  labing  kinakusgan  nga  tay-og  sa yuta. Apan kun  pagbuot  na sa Dios  nga magbubuhat  sa tanan  nga  papahuwayon  ka na  sa lubnganan  kinsa  bay  makapugong  sa  imong  kapalaran.