Ang buotan sa trabaho

Karong panahona, lisud kaayo ang mangaplay og trabaho. Daghan og kakompetensya nga usahay bation tag kaluoy sa kaugalingon, kay permi man gibasted o saaran lang nga tawagon kun manawat na kunohay.  Samtang nga maghuwat, mamasin na pud og pangaplay sa lain, hangtud na pudpud na lang ang sapatos, wa pa gyud tawon gisuwerte. Apan kun mosurender ka, aw samot.

Ang uban nga wa gyud mawad-i sa paglaum bisa’g nanggungis na, sige gihapon hangtud miabot ang iyang panahon nga nakatrabaho bisa’g dili mao ang iyang gusto o kursong gi-eskuylahan. Busa, kun may trabaho kana, ampingi nga makapakita ka sa tumang kakugi mo sa pagtrabaho. Tungod ini, may nakutlo kitang tinuod nga hitabo aron kakuhaan og giya nimo nga moasenso ka.

Usa kadto ka dautang panahon, didto sa Philadelphia, USA…may usa ka tigulang nga lalake, nakahukom nga magpalabay lang una anang gabhiona. Busa didto misulod sa usa ka gamay nga daan na kaayong hotel.Dihang didto na siya, matud sa clerk nga mi-asikaso sa kliyente, “Sir, sori kayo kay okupado na ang mga kuwarto dinhi, tungod kay may daghan mag kombensyon rong adlawa.”

Minghoy nga nahalingkod sa ka kapoy tawon ang magtiayong tigulang. Unya mipasiklab sa iyang relo ang clerk nga naluoy nagsud-ong sa kahimtang nga katulogon, kay kaadlawon na. Busa giagda kini niya, “Sir, adto na lang mo sa kuwarto ko, bisag di kayo nindot pero mamaayo ang pagpahuway ninyo didto.” Misugot kini ug iya pa gani gihatud ug giasikaso pag-ayo sa iyang kuwarto.

Pagkabuntag human nakabayad, miingon ang tigulang lalake, “Abe mo Dong, ang sama nimo ang angay nga manedger dinhi sa hotel, kay buotan ka. Sagdi lang kay sa umaabot nga panahon kun duna koy hotel ikaw ang himuon  kong piyalan sa negosyo ko.” Igo lang mipahiyum ang clerk nga nagpahiluna ma ihatud sa gawas ug gipasakay niya kini nga malipayon kaayong mikaway pa kaniya.

Duha ka tuig ang milabay, nalimot na ang clerk dihang may round-trip ticket siya gikan adtong gisilbihang mga tigulang. Pag-abot niya sa New York, di katoo ang clerk si George C. Boldt, kay siya ang unang manager sa usa sa bantug ug luhong hotel sa tibuok kalibutan ang Waldorf-Astoria Hotel. Nga ang tag-iya ini, mao si William Waldorf-Aster, kadtong tiguwang nga iyang giayo sa pag-atiman.