Dili lalim ning mahimong kapitan

Dugay na nga giduol og mga inilang politiko si Tolandoy nga mosalmot sa politika.  Nahimo siyang inila sa barangay Tungason tungod kay aktibo man kini sa mga kalihokan nga naglambigit sa kaayohan sa ilang kumunidad.

Sa panahon sa piyesta sa ilang kapilya dili kini magpanuko sa pag-abaga sa galastohan sa matag gabii nga kalingawan sama sa variety show, drama sa entablado ug konsiyerto  nga hugopan kanunay sa pagtambong sa mga batan-on, tigulang ug mga hingkod na ang panuigon.

Kun adunay pasiugdahang liga sa basketball  ang mga batan-on sa ilang dapit mao usab kini ang moabaga sa pagpalit og uniporme sa mga kopunan nga mosalmot sa liga ug mao pa kini ang mohatag og primyo sa mahimong mananaug gikan sa ikatulong ganti, ikaduha ug hangtod sa mahimong kampiyon sa liga.

Kun adunay mamatay sa ilang silingan mao usab kini ang mohatag sa libreng lungon, libreng pagpaimbalsamar sa minatay kay nanag-iya man kini og punirarya nga maoy nahimong panginabuhian sa ilang pamilya.

Sa matag panahon sa pagsaulog sa pasko  maoy himoon ni Tolandoy ang pagdapit sa ilang mga silingan sa gipahigayon nga kumbira ug gawas nga nabusdik sa pagkaon dili pa gayod maghayon ang tanan nga nanambong kay magkinagang man kini sa pagbitbit sa gihatag niining pinaskohan. Dihang natapos na  ang katapusang termino sa ilang kapitan sa barangay Tungason  mao kini ang giduso sa ilang mayor sa lungsod nga modagan og kapitan sa ilang dapit sa barangay Tungason.

Nagdumili unta niini si Tolandoy ug nangatarungan nga dili gayod niya hilig ang politika apan ang iyang mga silingan mihugyaw sa pagsuporta sa iyang kandidatura maoy hinungdan nga wala gayod siya makabalibad niini.

Tuod man nahimong kapitan si Tolandoy sa ilang dapit sa barangay Tungason ug sa pagligid sa katuigan sa iyang pagpangatungdanan maoy iyang namatikdan nga dili gayod diay lalim ning mahimong kapitan kay  ang tanang suliran sa ilang barangay ug lakip na sa iyang mga silingan siya na man ang  gihan-ukan sa pagsulbad.

Ang nakanindot lang usab hinuon nga nahimo na nga kapitan si Tolandoy  kay nalukop na niya og suroy ang maanindot nga mga dapit dinhi sa nasud sama sa Baguio, Bohol, Manila, Davao, Boracay ug uban pa nga mga maanindot nga dapit nga wala’y gasto kay ang panudlanan na man sa  gobiyerno ang moabaga sa seminar  ug lakbay aral ang ilang gihimo.  Dugang pa niini   naa pa gayod ang mayor sa ilang lungsod nga moayuda   ug mosugat sad dayon si congressman ug  si senador nga maoy mobangka sa ilang paglingawlingaw.