Dakong supak sa pork barrel

CEBU, Philippines - Nasuko na ang katawhang Pilipino. Gipakita sa ilang mga rally ang dako nilang pagsupak nga ipadayon ang gidawat nga pork barrel sa atong mga magbabalaud. Gusto na sa katawhan sa nasud nga hunongon na ang pork barrel kay kini ang ugat sa korupsiyon.

Ang atong mga senador ug congressman, gawas nga tigpanday og mga balaud alang sa kaayohan sa mga Pilipino ug sa nasud, mao usay tigbantay sa kuwarta sa gobiyerno nga gikan sa buhis sa mga Pilipino. Apan naunsa man hinuon nga ang uban kanila nahilambigit man sa giingong gikawat nga 10 bilyon pesos ni Janet Lim Napoles?

Pagkadakong kaulawan niini kun mahukman sila nga sad-an. Hinuon, gipadayon pa man ang imbestigasyon. Ang mga Pilipino naghulat sa hukom kun ang atong gobiyerno karon nagtamod ba gayud sa tinuod nga hustisya.